Andrea Piñeiro e Cristina Vázquez, do Firrete de Pontedeume, nun programa de detección de talentos
11 novs 2018 . Actualizado ás 22:03 h.A Federación Española de Piragüismo puxo en marcha, hai só uns días, un programa para a detección de talentos de canoa muller co obxectivo de Tokio 2020. É os próximos Xogos Olímpicos, por primeira vez, disputaranse dúas probas de canoa mulleres, a C-1, 200 metros e a C-2, 500. A paridade, a igualdade entre o home e a muller, abre esta fiestra, que hai moitas novas dispostas a aproveitar. Un total de 17 deportistas, de distintos clubs de España, foron invitadas a participar na primeira sesión deste programa, que se desenvolveu nas instalacións da Cartuxa, en Sevilla, durante a pasada semana. Alí estiveron dous padeeiros do Náutico Firrete de Pontedeume, Andrea Piñeiro Vales (21 anos) e Cristina Vázquez Vázquez (24 anos). As dúas teñen ás súas costas experiencia neste deporte. No caso de Andrea Piñeiro procede do kaiak, modalidade na que chegou a participar nun europeo da categoría júnior. Agora, está disposta a aproveitar esta oportunidade de gozar da posibilidade de acudir a unha olimpíada.
Cristina Vázquez formouse en canoa, modalidade na que foi medallista nun campionato de España, aínda que o deixou hai xa varios anos. Agora, do mesmo xeito que a súa compañeira, retoma a actividade ante esta gran oportunidade.
O obxectivo deste programa é fortalecer o equipo nacional de canoa, moi escaso de efectivos, con padeeiros que poidan render ao máximo nivel no 2020. Boa parte das probas que se realizan é para determinar capacidades.
Óscar Calvo, director técnico do Firrete, destaca a enorme capacidade destas dúas deportistas, aínda que subliña que aínda que non acaben finalmente no equipo nacional, terán podido gozar da experiencia.
Explica que agora mesmo non hai moita mulleres facendo canoa. «Non hai moitos anos, dicíase que a canoa, pola súa dureza, era mala para as mulleres, que lles podería prexudicar á hora de ser nais. Non era máis que unha lenda, non tiña ningunha base detrás, como se demostrou despois. Agora, a canoa ofrecerá unha gran oportunidade ás mulleres para acudir aos Xogos Olímpicos de Tokio no 2020».