Salvamento Marítimo entregou o luns a lancha, de 7,46 metros de eslora
19 ago 2025 . Actualizado á 10:50 h.LS Percebiño é o nome da nova embarcación de Cruz Roja en Cedeira. Esta foi a denominación máis votada das tres propostas polo alumnado do CEIP Nicolás del Río. As outras dúas eran Mella e A Percebelleira. Salvamento Marítimo entregou onte pola mañá a lancha que operará con base no porto cedeirense. Asistiron ao acto o presidente provincial de Cruz Roja, Manuel Viqueira, o responsable local e o xefe do Centro de Coordinación de Salvamento da Coruña, Roberto Pereira.
Cruz Vermella xestiona 44 embarcacións en todo o litoral español, a través do Convenio Marco de Cooperación subscribido con Salvamento Marítimo. Unhas son propiedade da oenegué e outras de Salvamento, como ocorre con LS Percebiño, en alusión ao marisco máis icónico dos que se extraen na zona e comercialízanse a través da lonxa cedeirense. Trátase dunha lancha semirrígida monocasco, en forma de uve, construída para unha vida mínima de quince anos, segundo indican desde Salvamento Marítimo.
Engaden que é capaz de permanecer durante oito horas seguidas no mar. É de aluminio naval, con 7,45 metros de eslora e 3,3 de manga. «Compleméntase cun sistema de seguridade de auto adrizado, porta de rescate na banda de estribor e un completo equipamento de navegación, comunicación e seguridade, preparados para as condicións máis adversas que poidan darse na zona», detallan.
Propulsada con dous motores fueraborda de 150 cabalos, pode acadar os 35 nós. Con tres tripulantes, ten capacidade para levar a oito rescatados. Salvamento e Cruz Roja agradecen á Policía Local e a Garda Civil a colaboración no transporte e a chegada da lancha á base.