Un incendio nun transformador deixou sen subministración eléctrica a veciños de Cedeira
CEDEIRA
Residentes na zona da Revolta avisaron ao oír explosións e ver saír fume da caseta
18 ago 2025 . Actualizado á 20:11 h.As chamadas de varios veciños alertaron do incendio declarado nun transformador de media tensión (15.000 voltios) situado na zona da Revolta, en Cedeira, ao redor da medianoite do domingo. Os residentes na zona oíron explosións e viron como saía fume do interior da caseta de formigón onde se atopa o equipo.
A agrupación de Protección Civil de Cedeira desprazouse deseguido ata este punto cunha motobomba e catro voluntarios e en pouco tempo lograron sufocar o incendio. Tamén se trasladaron ata o lugar do lume efectivos do Grupo de Emerxencias Supramunicipal (GES) de Ortigueira, cuxa intervención xa non foi necesaria. O 112 avisou, ademais, aos Bombeiros do Eume, dAs Pontes, pero a saída anulouse case ao momento.
Desde Protección Civil notificaron o sucedido a Naturgy para que mobilizase persoal e solucionase a avaría, que deixou sen servizo durante cinco horas e 47 minutos a 133 clientes, aos que correspondía o transformador afectado, e durante hora e media a outros 656. A compaña eléctrica colocou un grupo electróxeno e ás 7.30 restableceuse a subministración.