Cedeira creará un centro de interpretación da pedra formosa no castelo da Concepción
CEDEIRA
O Concello destina 40.000 euros á remodelación da fortaleza, situada ao pé do xacemento do Campo do Castro
10 may 2018 . Actualizado á 05:00 h.Unha das estancias do castelo da Concepción converterase en centro de interpretación da pedra formosa achada na escavación do xacemento do Campo do Castro, na punta de Ou Sarridal. É unha das actuacións previstas polo Concello de Cedeira dentro do proxecto de remodelación da fortaleza, dotado con 40.000 euros no presuposto municipal deste ano. «Queremos facerlle unha posta en valor e compatibilizalo co contorno, xa que está no ámbito do castro», explica a concelleira de Cultura, a nacionalista María Xosé Rodríguez, arqueóloga de profesión. «O castelo ten tres estancias, a do medio, na parte expositiva, quedaría igual, relativa á propia fortaleza, reformando os paneis e outros elementos -detalla-; e as outras dúas salas, unha dedicarase á cultura castrexa en xeral e a outra centrarase no monumento con forno do Sarridal, facendo un pequeno centro de interpretación da pedra formosa, dada a importancia que ten, xa que é a quinta que se atopa en Galicia».
Exposición de pezas do castro
As obras de acondicionamento do castelo da Concepción executaranse o próximo outono, segundo avanza a primeira tenente de alcalde. Unha vez que se complete a reforma, o Concello solicitará autorización á Dirección Xeral de Patrimonio, que financiou as dúas primeiras fases da escavación arqueolóxica do Campo do Castro, para expor na fortaleza as pezas atopadas no xacemento. «Estanse mandando ao castelo de San Antón, a A Coruña, e cando teñamos a obra acabada, a idea é poder mostralas aquí», adianta. Nas sondaxes iniciais, o equipo dirixido polo arqueólogo Emilio Ramil localizara cerámica castrexa e unha sigillata (cerámica fina) romana.
A responsable municipal de Cultura aposta por «ligar a visita ao castelo [erixido a mediados do século XVIII], que só na ponte do Primeiro de Maio recibiu máis de duascentas persoas, co xacemento». Destaca o interese do conxunto, nunha paisaxe extraordinaria, como referente do turismo cultural do municipio de Cedeira e da comarca.