Volven alagarse casas, leiras, rúas e o paso baixo a ponte do tren en Cabanas
CABANAS
As obras do saneamento e as choivas manteñen alagado o piñeiral desde hai dúas semanas
10 mares 2024 . Actualizado ás 17:46 h.A combinación de choiva e obras de saneamento volveu a deixar inundacións en Cabanas . Pasada a medianoite, a auga invadía o paso por baixo da ponte da vía do tren, complicando moito a circulación (para determinados vehículos resultaba imposible atravesar). Unhas horas despois, a vía quedara libre de auga e agora transítase pola zona con normalidade.
Pero a auga volveu a cubrir leiras (nalgunha xa hai días que ven patos) e entrou de novo en varias casas de urbanizacións da estrada da praia, que levan dúas semanas sufrindo este problema (o nivel de auga chegou a acadar os 20 centímetros). As rúas tamén están de novo cubertas de auga.
O piñeiral continúa alagado, igual que nos últimos días. O Concello emitiu un aviso o venres para impedir o acceso a este bosque situado ao pé da praia polo risco derivado do temporal de vento e choiva. Hai preocupación sobre o efecto da auga nas árbores, que levan dúas semanas encharcados.
A situación ha ir mellorando á longo da xornada nas zonas públicas, pero os xardíns e os inmobles privados continúan con auga. O alcalde, o popular Fernando Couce, insiste en responsabilizar aos donos: «Se a rúa está seca e o xardín do chalé de ao lado, cheo de auga, iso non é culpa do Concello, é un asunto particular. Eu podo asumir a miña parte da semana pasada, pero os propietarios terán que asumir que as súas instalacións non están ben ou non existen, nalgúns casos [en referencia a rexistros ou arquetas]».
No resto da comarca apenas se rexistraron incidencias, a pesar de que as precipitacións foron intensas en varios momentos. Con todo, ao coincidir as choivas máis fortes coa baixamar, non se produciron inundacións. Os Bombeiros do Eume tiveron que desprazarse a Boebre , en Pontedeume , para retirar unha árbore que se caeu e ocupaba parte dunha estrada.