Os traballos xa comezaron e está previsto que finalicen a mediados do próximo ano
04 jun 2025 . Actualizado á 18:08 h.Naturgy inviste 67 millóns de euros na modernización do parque eólico de Somozas, situado no municipio coruñés do mesmo nome, que implicará a retirada dos 81 aeroxeradores actuais e a súa substitución por 9 máquinas de última xeración. Os traballos supoñen o desmantelamento das máquinas existentes e a súa substitución por outras novas, máis modernas e eficientes, así como a restauración ambiental das zonas desafectadas e a modernización da subestación eléctrica.
Os traballos xa empezaron e está previsto que finalicen a mediados de 2026.
O proxecto de repotenciación está amparado con fondos europeos, e segundo subliña a empresa, «permitirá reducir notablemente o impacto paisaxístico e ambiental da instalación, á vez que aproveitará infraestruturas xa existentes, como as de evacuación ou parte das edificacións». Unha vez que o recinto sexa renovado, a súa potencia pasará de 49,6 a 46,4 megawatts, aínda que a súa produción anual de enerxía limpa escalará ata os 168 gigavatios á hora. É unha cifra equivalente ao consumo eléctrico de aproximadamente 48.000 fogares.
Unha parte substancial dos materiais procedentes do desmantelamento será reciclada e valorizada. Durante a fase de desenvolvemento do proxecto xestionaranse máis de 10,5 millóns de quilos, dos cales o 75% corresponde a aceiro ao carbono, o 17% a cemento e áridos, e o 9% restante componse fundamentalmente de cobre, aluminio, fibra de vidro, madeira e PVC, entre outros. Só unha fracción moi reducida, ao redor do 7%, composta por fibra de vidro e SF6, será tratada por xestores autorizados, conforme a normativa vixente.
A empresa eléctrica explica que o proxecto de repotenciación está a ser executado por empresas galegas, e subliña que reforza o seu compromiso coas enerxías renovables, senón que mellora a integración do parque na súa contorna natural e tamén impulsa o desenvolvemento económico local e a creación de emprego, consolidando ao municipio das Somozas como un referente en sustentabilidade e eficiencia enerxética.
María Landeira, delegada de Desenvolvemento de proxectos renovables de Naturgy en Galicia, «a repotenciación de parques eólicos é clave na nosa estratexia de crecemento renovable en Galicia, onde estamos a desenvolver tres proxectos que suporán pasar de 172 a tan só 25 aeroxeradores».
Naturgy foi pioneira en Galicia en repotenciación eólica co parque de Cabo Vilano (Camariñas), onde en 2016 substituíu 22 aeroxeradores por só 2, mellorando notablemente a produción e reducindo o impacto visual.