Ecoloxistas en Acción leva ao xulgado a denuncia de veciños das Somozas por unha canteira

Ecoloxistas en Acción presentou unha demanda nun xulgado da Coruña «polo grave impacto ambiental que está a ocasionar a canteira das Viñas na contorna, con vertidos e escorrentías aos afluentes do río Xuvia, que pertence á Rede Natura 2000». A organización canaliza a denuncia dos veciños das Somozas afectados pola mina. Aduce «a situación irregular» da canteira, «unha vez que a concesionaria orixinaria, Cuíña S. A., nunca a explotou, e que a lexislación establece que ao pasar máis de seis anos sen actividade desde a aprobación da Declaración de Efecto Ambiental [DEA], que data de 1996, esta vira nula».

Nin os veciños nin Ecoloxistas en Acción entenden como «a Xunta considera vixente a antiga DEA, eximindo á nova concesionaria, que adquiriu os dereitos mineiros durante a liquidación concursal, de realizar a necesaria avaliación do impacto ambiental causado pola explotación». Na demanda tamén se alerta de que a empresa «está incumprindo as medidas de seguridade e protección ambiental, xa que non construíu a balsa de decantación prevista no proxecto, polo que non hai ningún sistema de recollida das augas de escorrentía».

Ante o que cualifican de «desleixo da Administración galega», esta oenegué denuncia á compañía que explota a canteira por «presuntos delitos contra o medio ambiente e os recursos naturais»; e aos funcionarios que informaron a favor, «por prevaricación ambiental».

Unha andaina e unha misa

O colectivo de afectados está a organizar unha andaina polas pistas da zona da canteira e unha misa, que oficiará o cura de Xestoso (Monfero), Luis Ángel Rodríguez Patiño, nAs Viñas, «dado que o Papa Francisco dixo que estas actuacións son un pecado ecolóxico». Os veciños séntense «abandonados» pola Administración.

---

---

---