As bandas teñen de prazo para inscribirse ata o 29 de abril
24 may 2024 . Actualizado á 18:20 h.O prazo para inscribirse no Runas 2024 estará aberto ata as 23.59 horas do 29 de abril. O Festival de Ortigueira lanza así a campaña deste ano en busca de novos valores da música celta. Na primeira fase do proceso de selección, un comité técnico nomeado polo Concello escollerá ata un máximo de dez formacións.
A partir do 7 de maio e ata o 21 ás 14.00 horas, o público poderá escoitar e votar polos seus grupos favoritos na web do Mundo Celta. Os finalistas elixiranse mediante cinco votos: un do público (a través da web) e os outros catro dun xurado formado por músicos, xornalistas musicais e promotores seleccionados polo Concello.
Os nomes dos tres finalistas daranse a coñecer os días 22, 23 e 24 de maio nas redes sociais e a web do festival. Os elixidos actuarán na xornada inaugural do Mundo Celta, o 11 de xullo, e percibirán 1.500 euros cada un. O gañador formará parte do cartel de 2025, cun caché de 3.000 euros. O Runas celebrouse cada ano desde o 2000.