Sánchez e Díaz aceleran a iniciativa para aprobar un embargo de armas a Israel e agardan aprobala en setembro

O presidente do Goberno, Pedro Sánchez e a vicepresidenta segunda e dirixente de Sumar, Yolanda Díaz, acordaron impulsar a proposición de Lei que se tramita no Congreso para establecer un embargo de armas a Israel e agardan aprobala no mes de setembro.

Segundo indican fontes de Moncloa e da vicepresidencia segunda, Sánchez e Díaz acordaron dar un impulso a esta iniciativa a través dos grupos parlamentarios de PSOE e Sumar para que saia adiante despois do parón estival.

Esta iniciativa parlamentaria foi admitida a trámite o pasado 20 de maio, xa foi tomada en consideración e atópase en período de emendas.

Segundo trasladan, esta proposición de lei permitirá incorporar a figura do embargo á lexislación española, «consolidar así o embargo á industria militar israelí e estendelo a todos os materiais relacionados coa defensa e á asistencia técnica prestada por empresas armamentísticas dese país».

Esta norma sumaríase ao «bloqueo comercial» polo que non compra nin se vende armamento nin munición a Israel desde o 7 de outubro do 2023. España, ademais, incrementou o seu apoio financeiro a UNRWA, recoñeceu ao Estado Palestino, secundou as causas abertas ante a Corte Penal Internacional e a Corte Internacional de Xustiza contra Netanyahu, e ademais impulsou varias resolucións en Nacións Unidas para esixir un alto ao lume permanente e sen condicións, aseguran desde o Goberno.

«O respecto ao dereito internacional é o único camiño e o Goberno de España fará canto estea na súa man para defendelo», engaden.

---

---