Os Mossos d'Esquadra detiveron o martes ao segundo tenente de alcaldía de Calafell (Tarragona) e portavoz local do PSC, Miguel Ángel Perín, por violencia de xénero, ao agredir supostamente á súa exparella en plena rúa. Segundo avanzou onte Tarragona Dixital e confirmaron a Efe fontes próximas ao caso, testemuñas que presenciaron a escena na que Perín presuntamente agredía á súa exparella avisaron aos Mossos d'Esquadra, que se presentaron no lugar dos feitos e detivérono.
Miguel Ángel Perín, de 43 anos, é actualmente segundo tenente de alcaldía de Estratexia Urbana e portavoz do grupo municipal socialista no consistorio. Pola súa banda, o PSC, tras ter tido coñecemento dos feitos, decidiu abrirlle un expediente de suspensión de militancia a Perín, e desde a dirección do partido hanlle pedido que abandone o seu cargo no concello.
«Para os e as socialistas a violencia machista, sexa do tipo que sexa, é intolerable e inadmisible», indicou o partido nun comunicado, onde tamén engadiron que actuaron «con contundencia». «Nin queremos nin admitimos machistas no noso proxecto», sinalaron desde o PSC.