Vox busca que o seu deputado fiel siga como presidente do Parlamento balear
ESPAÑA
O PP insiste en que esta crise non afecta o Executivo de Marga Prohens
01 feb 2024 . Actualizado ás 21:53 h.Gabriel Lle Senne, presidente do Parlamento de Baleares , non está disposto a deixar de selo. O deputado de Vox foi expulsado o luns do Grupo Parlamentario. Unha circunstancia que, dado o Regulamento da Cámara autonómica, implica o cesamento de todos os seus cargos. Con todo, o político mallorquino asegurou onte no medio balear Última Hora que «a cuestión xurídica non está tan clara» e pedirá un informe aos servizos xurídicos do Parlamento que valide se debe dimitir. A Mesa conta con cinco deputados. Dous do PSIB-PSOE, outros tantos do PP e o propio Lle Senne. «Confío en que a mesa me dea o seu apoio. Só se trata de pedir informes xurídicos para actuar conforme a dereito. Estou niso. Vou falar con todos», remarcou Lle Senne, que se reuniu onte nunha cafetería con Iago Negueruela, portavoz socialista no Parlamento balear.
Lle Senne afirma que segue as directrices do comité executivo nacional de Vox . Os oito deputados que obtivo a formación tras o 28-M dividíronse o luns en tres faccións: os cinco deputados enfrontados coa directiva nacional que se manteñen no Grupo Parlamentario, os dous expulsados do citado grupo pola súa afinidade con Santiago Abascal e un terceiro, Francisco Cardona, que renunciou aos seus cargos en Vox en outubro e é desde entón un deputado non adscrito.
O desencontro no seo de Vox Baleares inqueda ao secretario xeral do partido, Ignacio Garriga. O tamén deputado catalán estimou en RNE que o Goberno insular, formado polo PP co apoio parlamentario de Vox, «afronta unha lexislatura incerta porque está ao albur das decisións de cinco persoas que demostraron que exclusivamente se moven por ambicións persoais». Garriga anunciou o luns que os cinco deputados que expulsaron do Grupo Parlamentario a dous dos seus compañeiros serán, á súa vez, cesados como integrantes de Vox. Un deles, Sergio Rodríguez, garantiu ao Partido Popular a estabilidade do Goberno autonómico. Ademais, remarcou que nin el nin os demais políticos que forman agora o Grupo Parlamentario teñen a intención de abandonar Vox. E, mesmo, Rodríguez mostrouse aberto a un reencontro coa dirección nacional: «Salvo a morte e os impostos todo ten solución nesta vida». O Partido Popular conta con 25 escanos no Parlamento autonómico e a maioría absoluta sitúase en 29, polo que os cinco políticos críticos coa directiva nacional de Vox poderían bloquear as súas iniciativas.
Tranquilidade popular
Os populares, pola súa banda, non consideran viable que caia o Executivo liderado por Margalida Prohens. «Quero sinalar que se trata dunhas disputas internas que afectan a Vox, que se producen no seo do Parlamento balear, non no seo do Goberno das Illas Baleares e que, polo tanto, non afectan nin ao Goberno nin á gobernabilidade», remarcou Miguel Tellado, portavoz do PP no Congreso.
A presidenta balear, Mardalida Prohens, pediu ao seu socio parlamentario que solucione as súas discrepancias internas. «Imos falando con todos e pedimos o mesmo que lles solicitamos en público, que se resolva a situación que é unha crise interna de Vox», remarcou a xefa do Executivo balear. «Eu, dentro dunha crise interna dun partido político que non é o meu, non teño nada que dicir, senón só facer un chamamento á responsabilidade», sentenciou Prohens.