A presión de Pablo Iglesias contra a monarquía non quedou só en encabezar unha petición de investigación no Congreso sobre as actividades de Juan Carlos I. Podemos, socio no Goberno de coalición, publicou un vídeo nas redes sociais no que se equipara á familia real cunha banda de narcotraficantes. Coa canción de sériea Narcos de fondo, e co título de Monárquicos , a gravación recolle diferentes momentos protagonizados polo actual xefe do Estado e a súa familia. Aparecen no vídeo a voda de Juan Carlos I e a raíña Sofía e a de Felipe VI coa raíña Letizia, así como fotos do emérito xunto ao ditador Francisco Franco, con príncipes sauditas, cazando ou navegando. Tamén se ve ao actual monarca montando en moto polos xardíns do Palacio da Zarzuela, así como á examiga de Juan Carlos I Corinna Larsen e a infanta Cristina e o seu marido, Iñaki Urdangarin, condenado no caso Nóos, declarando no xuízo. O vídeo conclúe recollendo titulares de prensa sobre as presuntas irregularidades de diferentes membros da familia do rei. Cuestionado directamente por esta montaxe, o presidente do Goberno, Pedro Sánchez, eludiu criticar ao seu socio de coalición e xustificou os ataques do partido do vicepresidente segundo, Pablo Iglesias , indicando que o PSOE e Podemos «son formacións políticas distintas que teñen tradicións diferentes». O líder do PP, Pablo Casado expresou o seu «absoluto respaldo» a Felipe VI e o seu «absoluto rexeitamento aos vídeos e declaracións que se están facendo por parte dos socios de Pedro Sánchez» e os secesionistas.