Dúas expertas propoñen, para gozar do Nadal ao máximo sen esgotar as enerxías, actividades como un retiro dixital ou darlles máis valor ás nosas tradicións
17 dic 2025 . Actualizado a las 09:07 h.Dentro duns días comezan as vacacións de Nadal. Un período festivo que implica tempo libre para saír da rutina e gozar. «Non a todas as persoas lles encantan estas festas, e non pasa nada», afirma Conxita López, mestra e membro do Colexio Oficial de Psicoloxía de Galicia (COPG).
Menos «scroll» infinito
«A televisión e as redes énchense de anuncios, mensaxes perfectas e moito brillo. E pode parecer que todo o mundo ten que ser feliz, mercar cousas ou vivir un Nadal de película, pero non é así» , remarca a profesional. Se notas que todo ese ruído te angustia, aconséllache que poñas un límite: «Menos scroll infinito e máis tempo real».
O Nadal, guste máis ou menos, ten algo bo: o tempo libre. Por iso, López propón un retiro dixital, desconectar do móbil. «Primeiro podes probar uns minutos sen pantallas, logo unha hora e, se te animas, un día enteiro». E con ese tempo que xa non dedicas á telefonía, prestar atención aos teus. «Pasa tempo cos avós, escoita historias que non saen en ningún libro. Xoga en grupo, pasea pola natureza ou visita a xente que queres».
E as tarefas escolares?
A psicóloga considera que tamén podes aproveitar para poñerte ao día con algunha tarefa escolar, pero puntualiza: «Sen estrés. Son vacacións, non un maratón». É dicir, que estas non supoñan todo o tempo libre das túas vacacións de Nadal.
Cóidate!
Para seguir con enerxía durante todas as vacacións, lembra coidarte. «Aproveitar para durmir ben, saír a airearte e comer con calma: cousas simples que axudan a manterse activo para facer plans», di López. Unhas pautas que subliña Rosaura Leis, catedrática de Pediatría e doutora no Hospital Clínico Universitario de Santiago (CHUS). «A saúde iníciase dende os primeiros anos de vida. Por tanto, a elección de estilo de vida que se faga agora será fundamental incluso para cando sexades maiores. Estas vacacións son boas para aproveitar para facer actividade física, durmir ben e coidar a alimentación», amplía.
Pon en valor a tradición
«É momento de recuperar a nosa cultura gastronómica, que é saudable e sostible. As familias, en xeral, estamos deixando de lado esta dieta por outras ricas en alimentos precociñados, azucre e graxas transaturadas», afirma Leis.
Os mellores mestres desa dieta, que se denomina atlántica pola nosa situación xeográfica, son os nosos maiores. «A dieta dos avós é saúde para nós», engade a catedrática de Pediatría. Por iso, axuda á familia preparando as típicas comidas de Nadal e propón pratos, como unha coliflor con patacas cocidas e bacallau. Puideches degustalo nalgunha ocasión? «É un prato moi bo no aspecto nutricional porque o peixe é fonte de omega 3», amplía Leis. Acórdate, iso si, de comer con moderación. «Soen ser días nos que as comidas duran moito tempo, copiosas, polo que é importante elixir un tamaño de ración adecuado».
Aceptas un reto?
López considera que, «se che vai o espírito rebelde», podes coller un catálogo de xoguetes e crear contraanuncios de Nadal. Tamén che anima a lanzarte a novos retos, como a papiroflexia, resolver pasatempos ou traballos manuais. «Rétate: cada día algo novo. Unha pequena misión diaria pode facer as túas máis divertidas. E xa que estamos, internet está chea de titoriais para aprender case que de todo: cociña, malabarismos, nós mariñeiros e incluso trucos coa bicicleta», suxire. O obxectivo é que ao acabar o día sintas que gozaches da xornada.
Un resumo do que podes facer
- Un retiro dixital. Conxita López recomenda desconectar do móbil uns minutos, unha hora... Poderías pasar un día sen el? «Menos “scroll” infinito e máis tempo real», di.
- Goza do tempo libre. O tempo libre, que de seguro que terás ao deixar o móbil a un lado, utilízao para estar cos teus, para xogar, facer exercicio, unha excursión pola natureza ou paseos.
- Durmir e comer. Para ter enerxía, non te esquezas de descansar o suficiente. Podes aproveitar estes días para non madrugar. E goza na mesa, pero con moderación: ollo coas comidas copiosas!
- Aprende tradición. Pasa tempo coas persoas maiores. Elas son as mellores mestras das tradicións que implican estas festas. E ten en mente isto: a dieta dos avós e saúde para nós.
- Rétate cada día. Podes lanzarte a novos retos cada día, unha pequena misión diaria para facer as vacacións máis divertidas: aprender novas habilidades, resolver pasatempos, traballos manuais. Goza!