Luka Modric, que remata contrato co Real Madrid o 30 de xuño, seguirá no conxunto branco a próxima tempada
03 jun 2024 . Actualizado á 01:23 h.Luka Modric pasou de ter pé e medio fóra do Real Madrid a gañarse a súa continuidade no conxunto branco tras conquistar a súa sexta Champions League co cadro merengue. O centrocampista de 38 anos comezou a tempada molesto, tal e como el mesmo recoñeceu, polo seu novo rol de suplente, un rol que finalmente acabou aceptando.
Aínda que Luka Modric remataba contrato a final de tempada co Real Madrid, o que facía que fose libre para negociar con outros equipos desde o pasado mes de xaneiro, o croata confirmou, despois de que o fixese Florentino Pérez tras a vitoria en Wembley, que seguirá unha tempada máis no conxunto branco. Fíxoo emprazando á afección para verse «a tempada que vén».
«Que alegría estar aquí outra vez despois de dous anos. Moitas grazas polo voso apoio. Esta Copa é tamén vosa e ata a tempada que vén. Ala Madrid!», declarou no fin de festa pola Décimo quinta no Santiago Bernabéu.
Así confirmou Florentino Pérez a continuidade de Modric no Real Madrid
As palabras de Luka Modric seguiron, por tanto, a liña das que pronunciou o sábado Florentino Pérez tras vencer ao Borussia Dortmund. «Seguro que vai seguir unha tempada máis, iso ninguén o dubida. Estamos moi contentos e el tamén de poder continuar unha tempada máis, porque é unha das grandes lendas que ten este club», afirmara o presidente do Real Madrid na zona mixta do estadio de Wembley á Cadena Ser.
Respecto a Nacho Fernández, que tamén acaba contrato e que igualmente sumou o seu sexto título da máxima competición continental, Florentino Pérez indicou que non sabe cal será o seu futuro. «Hai que preguntarllo a el. Estaremos encantados. É dono do seu destino e faremos o que el queira», asegurou o mandatario.