Marta Rivera da Cruz paséase polo centro de Lugo, Alfonso Rueda participa nun foro de igualdade en Vilalba e o BNG pide en Muras unha tarifa enerxética galega
10 jul 2023 . Actualizado ás 20:21 h.A maquinaria electoral dos partidos político en Lugo xa está engraxada a 13 días das eleccións xerais do 23 de xullo e cada unha das formacións xa pon amais da mesa os seus apoios e os seus valores.
O PP lucense recibiu a visita de Marta Rivera da Cruz, natural de Lugo e que vai de número dous na candidatura de Feijoo por Madrid. A política e escritora lucense afeou que Pedro Sánchez en cinco anos teña tido catro ministros de Cultura e dixo que o Goberno se esqueceu do que significa a cultura para o desenvolvemento dun país e o caso de Lugo é un exemplo», criticando a falta de investimentos nesta cidade, «onde hai un auditorio que o Concello segue tendo pechado».
Rueda en Vilalba
Outra cita dos populares na provincia estivo en Vilalba, onde o presidente do PPdeG, Alfonso Rueda, clausurou a media tarde o acto «É o momento da igualdade», unha mesa redonda na que participaron cargos da Xunta, do PP e candidatas do 23J: Elena Rivo, Sandra Vázquez, Marta González, Cristina Abades ou Paula Prado.
O PSOE en Terra Chá
Tamén en Vilalba, un par de horas antes, o líder do PSdeG, Valentín González Formoso, e o candidato José Ramón Gómez Besteiro mantiveron un xantar cos empresarios da Asociación de Empresarios de Terra Chá.
Besteiro tivo unha mañá activa pola comarca chairega, obtendo o apoio explícito da plataforma Galicia Baleira. Na carballeira de Mosteiro, en Pol, preto dun centenar de membros deste colectivo, que preside Jesús Vázquez, deron o seu aplauso a Besteiro e ao PSdeG, «cuxos representantes tiveron capacidade de escoita das nosas achegas, fronte ao silencio doutros como Rueda ou Pontón, dos que non sabemos nada a pesar de nosas reiteradas peticións de reunión».
«O problema da Galicia Baleirada está aí, somos conscientes e o Goberno de Pedro Sánchez xa está a traballar en aspectos concretos que responden a moitas das demandas desta plataforma veciñal: banda ancha no 100 % da provincia en 2024, un modelo de residencias para maiores sen listas de espera de dous anos como as da Xunta, unhas pensións dignas e melloras nas conexións que permitan aos máis novos elixir onde vivir», explicou Besteiro aos asistentes ao acto.
O BNG e o seu modelo Muras
E tamén na Terra Chá estivo o candidato do BNG, Daniel Castro, quen visitou Muras para pór en valor «como exemplo de que os gobernos do BNG benefician aos galegos, cun modelo de xestión enerxética que queremos defender no Congreso dos deputados». Castro lembrou que o Concello de Muras foi o primeiro de Galicia que asumiu parte do pagamento do recibo da luz dos veciños cos impostos procedentes dos parques eólicos situados no municipio O candidato do BNG defendeu o establecemento dunha tarifa eléctrica galega baseada «nun modelo tarifario que abarate o prezo da electricidade e permita que ese ben publico reverta no desenvolvemento social e económico de Galicia».