Seis alumnos galegos gañan premios nas olimpíadas científicas nacionais
EDUCACIÓN
Dous estudantes conseguiron prata na súa Xeoloxía e Matemáticas e outro obtivo o bronce en informática
07 nov 2025 . Actualizado á 17:14 h.O Ministerio de Educación, FP e Deportes foi escenario este venres da entrega de diplomas das olimpíadas científicas 2025 a un total de 71 alumnos de entre 3.º de ESO e 2.º de bacharelato, Resultaron os mellores en sete disciplinas: Física, Matemáticas, Química, Bioloxía, Xeoloxía, Economía e Informática. Neste grupo había seis galegos que se foron a casa con medalla ou diploma.
Santiago Otero Lago, estudante 1.º de bacharelato no IES Rosalía de Castro, en Santiago, recolleu a súa medalla de prata en Xeoloxía. Xa no verán volveu da cidade chinesa de Jining con dúas medallas internacionais: a de prata individual e a de bronce en competición por equipos. Hugo Gorgojo Basanta, estudante de segundo de bacharelato no IES Perdouro, de Burela, recolleu o seu diploma de cuarto posto en Xeoloxía; el tamén estivo durante o verán en Jining e de feito volveuse con tres medallas, dous individuais de bronce; actualmente estuda enxeñería na UDC. Tamén en Xeoloxía destacou Hugo Regueiro Pérez, que fixo primeiro de bacharelato no IES República Orienta do Uruguai (Vigo), que quedou oitavo na fase nacional.
Pablo Freire Fernández é alumnos do IES As Lagoas, de Ourense, e xa estando en cuarto de ESO obtivo o ouro na olimpíada galega de Matemáticas, e a nivel estatal levou a prata, que recolleu este venres. Pero ademais fíxose coa prata na cita internacional en Australia e o ouro na iberoamericana en Chile. En Matemáticas tamén destacou Miguel Cores Mejuto, alumno de bacharelato do IES Fernando Wirtz (A Coruña), que levou o sexto posto nacional e estivo con Pablo Freire en Australia este verán.
Na lista de galardoados estaba tamén David Lago Alonso, que fixo 1.º de bacharelato no IES Pedro Floriani (Redondela) cando conseguiu o ouro na olimpíada galega de informática. A nivel estatal obtivo o terceiro posto en Informática e o 8.º en Física.
Os galardoados recibiron, ademais do recoñecemento, premios por valor de 500, 750 e 1.000 euros, en función da categoría obtida.