Céntroa de arte da Fundación María José Jove abre o prazo para anotarse nos seus programas educativos
EDUCACIÓN
Visitas guiadas polo museo e charlas virtuais levarán a arte ás aulas galegas
16 sep 2025 . Actualizado á 09:31 h.As grandes obras de arte moderna teñen cabida na escola. É máis, deben estar no espazo no que se forman os mozos se se quere contar cunha cidadanía sensible ante a creación artística do seu tempo, e o que iso implica. O centro de arte da Fundación María José Jove (FMJJ) isto téñeno moi claro, e cada ano desenvolven moitas actividades para achegarse aos estudantes da comunidade.
Agora abre o prazo para inscribirse nos diferentes programas educativos.
Percorridos á colección de arte para a comunidade educativa: son visitas guiadas á colección do centro de arte FMJJ adaptadas ás diferentes etapas educativas: para educación infantil, o plan denomínase Contos á natureza; en primaria hai dúas opcións, O salto e O voo; en ESO, FP e bacharelato tamén hai dobre oferta, pode ser Ir, vir, levar, traer ou Un museo sonoro; e todos os niveis poden participar no programa O museo é unha escola.
As inscricións abren este martes 16 de setembro e para formalizalas hai que chamar ao teléfono 981 16 02 65.
Arte e escola: é outro dos programas, e inclúe tres opcións: Terceiro mestre, que neste curso aplícase á escola unitaria Donramiro, en Pontevedra, que utilizará un elemento natural —o millo plantado nunha leira de Oirós, en Vila de Cruzamentos—, para desenvolver unha observación atenta e consciente desde novas perspectivas, «entendendo a aprendizaxe como un acto colectivo desde a sensibilidade, a experiencia directa e o diálogo», segundo explican desde a FMJJ. Fomentarase a paciencia e o respecto aos tempos. O proxecto Aprender do bosque presentarase a semana que vén. E o terceiro plan é Conversacións imaxinarias en colaboración co Museo Moderno de Buenos Aires, Luis Camnitzer e o colectivo O Pensadero, un proxecto pensado para estudantes de ESO, FP e bacharelato no que grazas á tecnoloxía se xera un diálogo entre personaxes do pasado para entender o presente:« Aborda temáticas como o exilio ou o racismo a través das ricas conexións político-culturais de Galicia con Buenos Aires que tiveron lugar a principios do século pasado».
Os centros interesados en participar o poden facer enviando un correo a info@fundacionmariajosejove.org.