Os consellos de cinco expertos para saber en que formarse: «Non se trata só de estudar, senón de construír o teu futuro»
EDUCACIÓN
Personalidades das humanidades, a enxeñería, as ciencias, as ciencias da saúde e as ciencias sociais explican por que escolleron a súa carreira e que é o que máis lles gusta da súa profesión. Os artigos completos pódense ler na Guía de Estudos Superiores que se entrega este domingo gratis con La Voz
03 abr 2025 . Actualizado á 19:06 h.Non é o mesmo a idea que un adolescente ten dunha carreira que o que dita titulación implica na práctica. Os orientadores recomendan aos estudantes que non se guíen só polas saídas profesionais duns estudos, senón polas súas aptitudes, os seus gustos ou as motivacións persoais que eles teñan.
Para tomar esa decisión, ademais de coñecer toda a oferta educativa, é importante escoitar a opinión de persoas con experiencia. Toda esta información —a práctica e a persoal— van atopar na guía de estudos superiores que La Voz de Galicia entrega gratuitamente este domingo co xornal. Este ano, esta revista educativa inclúe cinco artigos, un por cada área de coñecemento nas que as universidades organizan os seus graos, de expertos que explican como lles chegou a vocación e como o seu traballo pode contribuír á sociedade.
Sobre as humanidades fala o filósofo José Antonio Marina: «Somos unha especie cunha orixe moi humilde e unhas expectativas moi grandes. Comprender esta grandeza e esta fraxilidade é tarefa dos humanistas», escribe, nun artigo no que lembra a importancia de conceptos como bondade, xustiza, beleza, dereitos... «que non son conceptos científicos. A idea de que un mundo cientificamente dirixido e tecnicamente organizado sería perfecto non é unha inxenuidade: é unha insensatez», sostén.
Susana Ladra, catedrática en Enxeñería Informática, recoñece que ela mesma comezou a estudar unha enxeñería «sen comprender en profundidade o alcance da carreira» na que se estaba matriculando; pero destaca que «os coñecementos e competencias adquiridas durante a carreira son útiles máis aló da vida laboral».
Pola súa banda, Victoria Otero, presidenta da Real Sociedade Matemática Española, fala con paixón das ciencias: «Seguir esa traxectoria estará repleta de retos e desafíos que conducirán a logros significativos e a unha profunda satisfacción persoal».
De buscar unha profesión que encha escribe tamén o médico xenetista Ángel Carracedo, que se refire ás carreiras vinculadas ao ámbito sanitario e subliña que «na vida hai que traballar moito, pero, se o teu traballo te fai feliz, non é realmente traballo». Ademais, no seu texto pon en valor a necesidade da «vocación de axudar aos demais por riba de calquera outra cousa» que deben ter os estudantes que elixan estas carreiras sanitarias.
Para rematar, a economista Susana Quintás explica a súa formación baseada na súa carreira profesional, pero tamén na súa experiencia como nai que pasou recentemente pola elección de carreira dos seus fillos. «Non se trata só de estudar, senón de construír o teu futuro», escribe, e anima a elixir «con curiosidade, con ganas de aprender e crecer. Non tes que telo todo claro agora. O importante é empezar e estar aberto a descubrir novas oportunidades».