Estrutura e avións non tripulados tiran da recuperación do sector
10 feb 2023 . Actualizado á 13:06 h.Tras a pandemia, a crise de Ucraína veu a reafirmar un cambio de paradigma na industria aeronáutica e do transporte aéreo. O perigo de desabastecemento de materias primas, tanto para a construción de avións como enerxéticas, o peche do espazo aéreo ruso, así como a necesidade de reforzar e lanzar unha Europa da defensa, como xa existe noutros ámbitos, xera riscos pero tamén novas oportunidades de carga de traballo.
Este novo escenario coincide co arranque da recuperación do sector galego, que pechou o 2021 con vendas por valor de 89 millóns de euros, un 6% máis que no fatídico 2020, marcado polo derrubamento de pedidos e a caída do tráfico aéreo desencadeado pola pandemia, segundo datos do Consorcio Aeronáutico Galego que celebrou onte en Vigo a súa asemblea xeral, que contou coa asistencia do vicepresidente segundo da Xunta e Conselleiro de Economía e Industria, Francisco Conde.
O que transcendeu, ao termo da xunta, tras a análise da conxuntura do sector, é que a aeronáutica segundo o propio Conde, é unha industria emerxente que está a tirar da recuperación económica. «Presenta oportunidades de futuro moi relevantes, tanto no ámbito da construción de estruturas como na área dos vehículos aéreos non tripulados» afirmou, destacado que, pese ao freo da pandemia, a industria aeronáutica galega conseguiu manter o emprego.
As previsións son boas. Os contratos das empresas galegas coa firma Airbus manteranse ou ampliaranse este ano nos modelos comerciais A320 e A350.
Por outra banda, o polo aeronáutico de Rozas (Lugo) segue crecendo coa chegada de novos socios industriais (en proceso de licitación) que se suman ao establecidos. «Xa temos garantida a continuidade de Boeing e Indra, que están a desenvolver un simulador vinculado á xestión de tráfico aéreo tripulado e non tripulado, que permitirán que Galicia siga sendo unha referencia», engadiu Conde, que destacou tamén as opcións que se abren para o sector coa entrada no proxecto FCAS, o avión europeo de combate, un plan que depende do Ministerio de Defensa e que está coordinado por Indra.
Pero coa carga de traballo que está por vir, un dos principais retos das empresas é atopar persoal cualificado. «O consorcio busca tratar de incrementar os 1.250 empregos directos, que se suman a outros 400 postos de traballo indirectos, que xera a industria aeronáutica e aeroespacial a través de máis de 40 empresas», manifestou Enrique Mallón, presidente do Consorcio Aeronáutico .
Máis de 84 millóns actualmente en execución no polo de Rozas
A aeronáutica non tripulada é a grande aposta industrial da Xunta e onte o responsable de Industria garantiu recursos para seguir potenciando este novo nicho de negocio do sector aeroespacial. «Seguimos impulsando o Polo Aeroespacial Galego, que ten actualmente 84 millóns de euros en execución, que están a permitir a continuidade dos 160 millóns investidos entre o 2015 e o 2020», todo iso no marco dunha estratexia que agarda mobilizar un total de 540 millóns en colaboración pública e privada, segundo manifestou Francisco Conde.
Entre as iniciativas que están en marcha en Rozas lembrou a convocatoria para atraer novos socios industriais. «Hai nove candidaturas de empresas e consorcios para dar continuidade aos proxectos xa iniciados», adiantou o conselleiro.
Lembrou que a Administración galega colabora co Consorcio Aeronáutico para activar un observatorio lanzado polo consorcio xunto coa Xunta de Galicia, unha colaboración «moi relevante que vai impulsar múltiples estudos do sector»; e que está pendente da convocatoria do PERTE da industria aeronáutica para aspirar a fondos europeos Next Generation.