O obxectivo é apoiar o crecemento de proxectos de autónomos e pequenas e medianas empresas
30 ene 2020 . Actualizado ás 18:37 h.O Plan de financiamento empresarial de Galicia xa ten cantidades e obxectivos para o 2020. A Consellería de Economía levou para a súa aprobación ao Consello da Xunta varias liñas de axudas que, a través do Igape e de XesGalicia, queren dar estabilidade e impulso a 1.900 emprendedores, que disporán de 103 millóns de euros en créditos. O Goberno galego quere focalizar estas achegas públicas nos autónomos e as pequenas e medianas empresas, co obxectivo de que sexan máis grandes, que avancen no ámbito da industria 4.0 e que sexan máis innovadoras.
Unha das liñas será específica para as auxiliares do sector naval, que contarán con financiamento vantaxoso e préstamos directos de entre 50.000 e un millón de euros cun prazo de amortización de cinco anos, aínda que tamén poden acollerse a estes incentivos empresas con investimentos estratéxicos en transporte por estrada utilizando combustibles alternativos, en infraestruturas de uso compartido ou os proxectos impulsados por centros tecnolóxicos e asociacións empresariais.
Innovación en turismo
Algo máis de 12 millóns resérvanse para corenta iniciativas innovadoras no ámbito turístico, mentres que 8,8 destinaranse a avais para pequenas e medianas empresas. Tamén haberá unha nova liña de actuación —16 millóns— para apoiar a modernización industrial, premiando de novo a creación de espazos de uso compartido. No ámbito das novas tecnoloxías está previsto apoiar 27 proxectos.