Estefanía Fernández cultiva té na súa leira de Redondela, apostando por un produto en expansión en Galicia, o cal adereza con flores de roseiras antigas compartidas polos seus veciños
18 dic 2025 . Actualizado á 10:44 h.Despois da auga, o té é a bebida máis consumida do mundo. Miles de millóns de persoas toman a diario cuncas e cuncas desta infusión que se popularizou en Europa a través do despregamento oriental de Gran Bretaña. É un produto que en Galicia está a entrar aos poucos nos hábitos da poboación, abríndose unha interesante espita para quen se aventure a cultivalo. «A xente non se anima a botalo porque non saben a quen llo van vender», comenta Estefanía Fernández, unha desas «valentes» que decidiron apostar por té autóctono, pero iso si, dándolle unha volta e potenciando o seu aroma empregando rosas.
Natural de Redondela, esta agricultora e emprendedora ten o seu centro de operacións en Silleda, onde vive e rexenta Mamasunción, un negocio para a degustación de produtos artesáns e ecolóxicos. Alí planea comercializar o seu té verde aromatizado con rosas, que colleitou coa colaboración dos seus veciños no municipio dezán e tamén en Redondela, onde posúe as plantacións de té.
Tras moito tempo emigrada, os últimos sete anos en Nova Zelandia, Estefanía quixo fincarse en Galicia e botar raíces a partir dunha actividade. Foi reformando unhas casas familiares cando xurdiu a idea do té. «Buscaba un cultivo para as fincas, que son tres socalcos grandes que tiñan viñedos cando era pequena. O meu pai empezou a plantar frugais, pero eu quería un cultivo de baixo mantemento e aí estaba o té. É unha camelia, polo que se da ben, está perfectamente adaptada e apenas ten pragas», explica.
A partir de aí empapouse de información, primeiro da man de Beatriz Piñeiro, pioneira na produción de té de Galicia, e despois con cursos da estación fitopatolóxica Areeiro da Deputación de Pontevedra. «Organizaron un encontro para animar a pequenos produtores das Rías Baixas a facer plantacións de té», lembra.
Un lugar ideal
«Eles levan moitos anos investigando o seu cultivo nesta zona, porque o clima é idóneo. Loitamos co feito do descoñecemento, porque aquí non hai tradición de tomar té», conta Estefanía, que aproveitando os consellos de Areeiro, impulsou a súa plantación. «Mentres en Asía sacan unha colleita cada mes, aquí podes facelo cada dúas semanas. O ritmo de crecemento é enorme, hai un nicho que a xente non é consciente», explica.
Ao estar fincada en Silleda, non sempre pode ir a Redondela para vixiar a plantación, polo que o té permite esa flexibilidade para controlar a distancia a produción. «Ao mellor boto dúas ou tres semanas sen ir alá e non podo cultivar, pero non lle pasa nada ao té. Permíteme facer unha poda e seguir colectando despois, xa que nin se deteriora a planta nin baixa a calidade do produto, é súper flexible», apunta.
Estefanía explica que a partir de marzo empezará a colleita, considerando comprar maquinaria para sacar maior rendemento. «Ata agora estouno facendo dende a casa, o té verde non ten moita ciencia, cunha tixola e pouco máis xa o fas na casa», sinala.
Cazadora de rosas
A agricultora silledense considerou interesante aproveitar as rosas para dar un toque diferente ao seu té autóctono. «Na miña casa sempre gustaron as flores e en Areeiro animáronos a combinar o té con herbas aromáticas. Púxenme a investigar e descubrín que as rosas máis aromáticas son as máis antigas, pero tamén son as máis difíciles, xa que levan moito tempo dende que se enraíza o esgallo ata ter a primeira flor», explica.
Aproveitando un concurso do Concello de Silleda para percorrer as parroquias do municipio, Estefanía colocou carteis en cada unha buscando roseiras antigas. «A acollida foi incrible, teño unha vintena de variedades. En Redondela fíxeno en outono e tamén foi boísima», asegura.
Unha vez deshidratados os pétalos de rosa, estes mestúranse co té 100% das Rías Baixas, obtendo un «sabor que non ten nada que ver co que consumimos habitualmente, notas a influencia do mar, é máis saboroso, cun toque salgado que combina coa dozura das rosas».
Proxecto múltiple
A do té é unha pata máis do proxecto que pretende pór en marcha a longo prazo. Estefanía leva desde o 2020 rehabilitando dúas casas que pretende explotar para turismo, ofrecendo aos visitantes unha experiencia que combine a paz da súa estadía en plena natureza coa mellor gastronomía galega. A intención de Estefanía Fernández é ofrecer o seu té verde con rosas e outros produtos ecolóxicos desde a súa horta á mesa dos hóspedes, enfocándoo especialmente ao público británico, posto que «sería o que máis apreciaría este tipo de produto». Mentres, dedícase en corpo e alma ao seu negocio de degustación en Silleda, Mamasunción, onde vende algunha das súas elaboracións ecolóxicas como pronto o será o seu té verde.