A «landparty» de Silleda remata esta tarde con máis eventos
12 oct 2025 . Actualizado á 05:00 h.A intelixencia artificial foi protagonista na segunda xornada da XGN Intermax que se celebra no recinto Feira Internacional de Galicia Abanca de Silleda. As propostas formativas, con conferencias e talleres para achegar a informática e a tecnoloxía a todos os públicos, multiplicáronse neste segundo día.
A primeira das charlas foi sobre o uso da IA na música, seguido dunha conferencia sobre como os videoxogos poden ser un espazo de encontro, comunicación e atracción de talentos. Pola tarde, o programa comezou cunha charla sobre a aplicación da intelixencia artificial aplicada á impresión 3D de medicamentos personalizados, a cargo de Álvaro Goyanes, profesor de Farmacia na USC e cofundador da primeira empresa dedicada á impresión de medicamentos. Tamén houbo espazo para a evolución das consolas e dispositivos clásicos, demostrando como darlles unha segunda vida e adaptalos ao presente.
Ademais das conferencias, tamén houbo talleres, destacando un sobre o hackeo de dispositivos electrónico, outro sobre «hacking» ético e un de programación. Así mesmo, houbo competicións de arte dixital, videoxogos e de habilidades en ciberseguridade.
Visita institucional
A XGN Intermax AI Edition contou coa visita do Conselleiro de Cultura, Lingua e Xuventude, José López Campos, quen visitou a feira acompañado pola directora xeral de Xuventude, Lara Meneses; a alcaldesa de Silleda, Paula Fernández; e o director da Feira Internacional de Galicia Abanca, Ricardo Durán.
A «landparty» continúa hoxe coa área exclusiva para rexistrados activa, a Intranet. A Extranet, de acceso libre, finalizou a súa actividade onte pola noite. Doutra banda, esta tarde entregaranse os premios dos torneos, pondo o punto e final a esta 25 edición do evento, o cal conta co apoio da Xunta de Galicia a través da Consellería de Cultura, Lingua e Xuventude, e co patrocinio oficial da empresa Intermax Technology. Así mesmo, nesta edición o provedor galego Raiola Netwoks súmase ao evento cun patrocinador e o Clúster TIC Galicia patrocina o programa de conferencias.