Un 1 de decembro do 2022 aprobábanse as cifras económicas para o 2023 e agora aínda nin se deron a coñecer en público
02 dic 2023 . Actualizado ás 05:00 h.Entre os mantras que atesoura o alcalde de Lalín, mandato tras mandato, figura en postos de honra a aprobación dos orzamentos municipais para que entren en vigor o día 1 de xaneiro do ano en que se xestionan. Ocorría sen ir máis lonxe no 2022, cando xusto fixo onte un ano o goberno local do PP aprobaba en solitario —toda a oposición criticaba o adianto da sesión sen ter buscado consenso previo— as cifras do 2023, que se elevaban por se alguén non o lembra a 20,1 millóns de euros, cun significativo recorte. Pero esa máxima de José Crespo parece complicado cumprirse nesta ocasión a tenor dos prazos.
Se o pasado ano xa se presentaron en sociedade o 24 de novembro, nunha rolda de prensa onde o rexedor estivo arroupado por Paz Pérez e Pablo Areán, por agora nada se sabe do orzamento municipal de Lalín para o 2024. Na última sesión plenaria algún indicio en intervencións do rexedor xa permitían ler entre liñas que nesta ocasión o mantra de estrear ano coas partidas xa fixadas podía incumprirse.
Que está causando esa demora en confeccionar o orzamento? Algunhas voces apuntan á carga de traballo existente nos departamentos vinculados aos números, pero tamén se alude aos problemas para cadrar as contas. Contentar a todos os concelleiros, cubrir os gastos previstos e acadar os ingresos necesarios convértese nun sudoku complicado, a pesar de recuperar tributos ou subir o 25 % o IBI de urbana. O diñeiro, como se adoita dicir, non cae do ceo e ademais o Concello está condicionado nestes momentos por créditos de importantes contías a sufragar. E co Estado converténdose nun quebradizo de cabeza ao conxelar o pagamento de subvencións pendentes do IDAE e o Dusi. A principios do 2024 roldarán os 7 millóns de euros, contía moi significativa posto que supón o 30 % do orzamento fixado para este 2023 xa na súa recta final.
Ao goberno local está a tocarlle facer encaixe de palillos para confeccionar as novas macrocifras económicas que marquen a xestión do 2024, aínda que neste caso sen a presión de ser ano electoral. Queda agardar xa que logo a se hai un novo recorte e en que contía queda a débeda.
Á marxe de cuestións meramente económica os prazos parecen xa moi exiguos para que o orzamento do 2024 comece a xestionarse o día 1 de xaneiro. Porque debe ir a comisión informativa, aprobación plenaria, publicación no BOPP,... e a próxima semana hai dous festivos. O mantra, case seguro, incumprirase.