Carlos Santos busca a resonancia na súa arte en busca dunha sociedade humanizada

Resonancia. Unha socioloxía da relación co mundo leva a firma do filósofo alemán Hartmut Rosa. Un libro que forma parte do ideario vital de Carlos Santos, pintor colombiano afincado en Lalín que hoxe abre exposición no Café Casino. Unha mostra que precisamente leva por título Resonancia, onde ofrece a súa visión artística da necesidade de buscar unha sociedade máis humanizada, de facer unha parada no vórtice que nos engole no día a día para estreitar os nosos lazos con outras persoas, coa contorna e a natureza.

A mostra inclúe 25 das súas obras dos últimos anos, aínda que Carlos Santos leva ao redor dunha década de creacións nesa liña de pensamento. Entre elas hai tres de gran formato, complementadas por outras medianas ou obras pequenas. Desde tea a papel, cartón ou madeira conforman os distintos soportes onde plasma os seus anhelos artísticos a través de técnicas mixtas, con pasteis, acrílicos ou lapis.

O elemento humano cobra protagonismo nesta selección, figuras esbozadas ou silueteadas, sen trazos que as definan e convértenas en estereotipos. O abrazo, en parella ou comunitario, predomina e cobra protagonismo en moitas desas obras de persoas indefinidas convertidas en arquetipos desa necesidade de unión, «de buscar solucións no encontro co outro, na resonancia como sentimento», explica Carlos Santos.

«O humano xunto ao mental pode solucionar o futuro do mundo», asevera convencido o pintor, que xoga coas formas nas súas obras, sen esquecer dar protagonismo á cor, en ocasións en tons máis planos, noutras nunha amálgama que achega viveza. Para Carlos Santos, «o encontro co outro pode axuda a reformular a sociedade actual, que require pronto de solucións dada a súa deriva; sentir en lugar de vexetar, facer unha parada ante esa presión das redes sociais e ter unha resonancia que nos permita renovarnos, porque non se ven as esquinas, non se ve máis aló dun mesmo».

Carlos Santos remarcaba respecto ao libro de Hartmut Rosa que nel o autor faise a pregunta de que é a boa vida. Entre elas figura, apunta, ter unha boa relación cun mesmo, coa natureza, con aqueles que nos rodean. Como o propio artista escolleu para o cartel da exposición, nunha frase do mesmo filósofo, «se a aceleración é o problema, entón quizais a resonancia sexa a solución», ante ese mundo acelerado e tolo no que estamos inmersos.

Para este creador, «resonancia soa parecido a empatía, tamén a encontro co outro, con outras persoas». Remarca que os abrazos que copan boa parte da exposición xa tiveron presenza ao longo da historia da arte plasmados por numerosos pintores, que buscaron reflectir ás persoas nese momento tan emotivo que se chama resonancia. Santos resaltaba que desde que recalou en España no 2009 o día de máis abrazos sen dúbida foi a consecución da Copa do Mundo de fútbol en Sudáfrica, cando «ninguén era estraño para ninguén, foi pura resonancia por ese interese común». Cre que agora necesitamos atopar de novo ese punto de encontro, «que nos faga non sentirnos estraños para enfrontarnos a un mundo repleto de situacións complexas».

Actuación musical

A inauguración da exposición terá lugar hoxe ás 19.00 horas. No acto contarase co complemento da música, acudindo Saúl Meléndez desde Vigo coa súa guitarra para interpretar varios temas de creación propia. Unha interesante mostra que sen dúbida merece achegarse estes días ao Café Casino de Lalín, en busca de achar neses abrazos a calma que necesitamos nesta vida sen freo. Temos tempo ata o 2 de xuño.

---

---

---