Isi defendeu en Lalín o orgullo de «ser o que queiras, sendo boa persoa»
12 may 2024 . Actualizado á 05:00 h.A primeira en situarse ao pé do palco do Orgullo de Lalín foi unha lalinense de 97 anos fan de Isi (José Manuel Rodríguez Puente) e oínte fiel do seu programa que se achegou para poder coñecer en persoa ao humorista estradense encargado este ano de dar o pregón, Xunto a outras veciñas todas fixéronse con Isi fotos de recordo, falaron e intercambiaron bicos e abrazos. Xa no escenario, despois da presentación de Enfant Bello que destacou esta festa da diversidade que no Quilómetro Cero dá o pistoletazo de saída ao resto das do Orgullo de Galicia e a intervención da concelleira de Igualdade, Carmen Canda, Isi deu o seu pregón.
Foi ao redor dunha media hora de intervención desde o corazón e sen guion na que ganduxou anécdotas e destacou que «hai que vivir, querer e que te queiran». Aínda que recoñece que «moito melloramos» sinala que «queda aínda camiño por facer» e defendeu a importancia e o orgullo de «ser o que queiras» pero «ser boa persoa», de ter amigos e familia que te queiran tal e como es porque ese, dixo, «é o éxito da vida». E ese é «facer cousas na vida» e vivir como queiras vivir sen ter medo ou pensar no que dirán e «sen importar con quen te deites, porque iso a quen lle importa, que máis da». O importante «e querer e que te queiran, ter unha parella que sume, que che aporte».
Cre que todo se solucionaría «se nos quixeramos máis, con máis bicos e máis abrazos e máis dicirnos cousas bonitas» como un xeito de combater a violencia que aínda sofren moitas persoas. Falou da importancia da familia e do seu apoio aos seus fillos tal e como sexa porque hai moitas persoas que poden ser diferentes aos demais. Isi avogou por abrir a mente porque «o respecto é o máis bonito do mundo». Ao acto asistiron, entre outros, o alcalde de Lalín, Román Rodríguez; o conselleiro de Educación, Román Rodríguez e a directora xeral de Promoción dá Igualdade, María Quintana xunto cunha nutrida representación de edís do goberno local. Tras o pregón actuou o grupo Factoría de Subsistencia.