Ese paso activará a designación de Óscar Val como novo rexedor de Agolada, nunha sesión onde ademais se abordarán cambios na ordenanza da recollida de lixo
04 dic 2025 . Actualizado á 05:00 h.Dezaseis días despois de anunciar a través das redes sociais a súa dimisión como alcalde de Agolada, a marcha de Luis Calvo Miguélez do cargo e da corporación se oficializará no pleno ordinario fixado onte para o 9 de decembro. Nesa sesión confirmarase a marcha do líder da Partido Anticorrupción e Xustiza (PAYJ), demandada xa en varias ocasións desde a oposición —tanto PP como BNG— segundo coñecíanse as decisións dos tribunais en casos abertos contra o rexedor. Pero tocou agardar ao último fallo do TSXG —coñecido o pasado 20 de novembro— no que condenaba a Calvo Miguélez a nove anos de inhabilitación para cargo público por un delito de prevaricación administrativa. Unha sentenza que decidiu non apelar no prazo marcado e que motivou esa dimisión pola súa banda.
A oficialización da marcha de Luis Calvo tras algo máis dun mandato e medio no cargo, despois de lograr senllas maiorías absolutas —aínda que a segundo con menos concelleiros no seu grupo— activará o proceso para que o actual tenente de alcalde, Óscar Val García, asuma o bastón de mando. Ademais débese elixir o substituto de Calvo na corporación representando ao PAYJ.
O final político a nivel municipal de Calvo Miguélez quizais quede tan só sobre o papel. Algunhas voces apuntan a que vai estar detrás das decisións que adopte o seu substituto e o grupo do PAYJ. Dalgunha forma agarda que siga exercendo o poder na sombra, reducindo o protagonismo de Óscar Val, cun cargo institucional e oficial aínda que na práctica seguindo o ronsel que marque o seu antecesor, a quen sempre defendeu nas súas actuacións e a pesar das sentenzas xudiciais.
Nesa sesión plenaria do día 9, que comezará ás 10.00 horas, inclúense outros asuntos entre os que destaca a aprobación dunha modificación da ordenanza fiscal da taxa de recollida de lixos. Ademais, debateranse catro mocións do BNG, aínda que unha queda xa obsoleta porque pedía a dimisión de Calvo. O resto céntranse na mellora de camiños rurais de monte de titularidade municipal, a garantía de servizos para os maiores e o rexeitamento á posible implantación dunha planta de biogás.