Os traballos no castro de Barbude desvelan unha muralla de época castrexa

A Estrada está a sacar brillo a un dos seus tesouros esquecidos. O castro de Barbude por fin conta coa atención que merece a través dunha prospección arqueolóxica impulsada pola Xunta para pór en valor este xacemento, que outorga unha valiosísima información sobre este tipo de asentamentos na zona e o modo de vida dos nosos devanceiros. Os traballos realizados nas últimas semanas sacaron á luz os restos dunha muralla de época castrexa, e se ben aínda está en proceso de estudo, adiviñan unha fortificación defensiva que inclúe unha construción exterior e outra circular na parte superior.

Para comprobar in situ os primeiros achados da campaña, o conselleiro de Cultura, José López, acudiu ao lugar acompañado polo director xeral de Patrimonio, Ángel Miramontes, e o alcalde da Estrada, Gonzalo Louzao, xunto con varios concelleiros do goberno local. «Trátase dun importante achado que nos axuda a ampliar o coñecemento sobre o patrimonio máis sobranceiro da nosa comunidade e que se complementa coa localización de material composto por cerámica da Idade de Ferro», declarou López.

As escavacións, realizadas por Adro Arqueoloxía, deixaron ao descuberto unha parte importante da muralla no acceso ao castro, pondo o foco á súa vez nunha parte que levantou especial interese: un saínte da estrutura, fóra da muralla. Así mesmo, os traballos céntranse na limpeza dos perfís de acceso á zona máis alta do castro, así como na realización de dúas sondaxes para avaliar unha das parcelas e o camiño de entrada.

Neste sentido, as primeiras conclusións detallan que o muro se atopa en bo estado de conservación, descubrindo unha especia de baluarte ou bastión defensivo de grande entidade. Tamén se recompilou material de diversas épocas, como medieval e romano, pero non son orixinais do xacemento, que é moito máis antigo. Se se constatou que na parte superior todo pertence á época castrexa, ao redor do século II e I antes de Cristo.

Divulgación

Por outra banda, o proxecto compleméntase coa elaboración de materiais divulgativos entre os que se inclúe un vídeo e unha reportaxe fotográfica aérea. Os materiais, principalmente cerámicos, consérvanse no Museo de Pontevedra, mentres que outros foron entregados ao Museo do Pobo Galego.

O conselleiro de Cultura declarou que esta actuación contou cun investimento de 17.700 euros e encádrase no Plan de actuacións arqueolóxicas da Xunta. Un proxecto dotado con 1,5 millóns de euros, en solitario ou coa colaboración de institucións académicas e concellos, para «garantir a conservación dos xacementos ao tempo que se favorece o achegamento á historia por parte da cidadanía».

Visita este sábado

Precisamente neste último obxectivo quere incidir o Concello da Estrada, que organiza para este sábado unha visita guiada para que os estradenses descubran este tesouro patrimonial. Unha ruta guiada polo xacemento de forma gratuíta con saída en autobús ás 10.30 horas desde a Praza do Concello. Os interesados poden reservar a súa praza de xeito presencial no departamento de Cultura ou ben no número de teléfono 986.573.601.

---

---

---