As piscinas da Estrada baten este ano a súa marca e rexistran xornadas con case 400 bañistas
A ESTRADA
En agosto as instalacións municipais acolleron a 4.589 persoas, un 74% máis que no mesmo mes do ano anterior
16 sep 2025 . Actualizado á 05:00 h.O 15 de setembro é, tradicionalmente, a data de clausura das piscinas municipais do Concello da Estrada. Ao coincidir este ano en luns, xornada de peche técnico das instalacións, a tempada de baño quedou pechada o domingo. O departamento de Deportes, dirixido por Ismael Pena, fixo onte balance. As cifras son claras e mostran que o de 2025 foi un estío con marca de acceso nesta área lúdico-deportiva.
Un verán moi cálido e a entrada gratuíta durante toda a tempada explican o escenario que debuxan unhas cifras de afluencia que pouco teñen que ver coa concorrencia a estas instalacións no exercicio anterior. O mes de agosto é bo termómetro para medir esta comparación: en agosto de 2024 accederon ás piscinas municipais 2.642 persoas, mentres que en agosto deste ano foron 4.589.
Ademais, este incremento de case o 74% hai que entendelo tamén concentrado nas tres primeiras semanas do mes vacacional por excelencia, xa que os últimos días de agosto houbo un empeoramento das condicións meteorolóxicas que se traduciu nunha asistencia case anecdótica de bañistas.
A tempada estivo este ano marcada pola gratuidade no acceso ao recinto, unha decisión que o goberno que encabeza Gonzalo Louzao adoptou ante a demora na apertura da piscina grande, sometida a importantes obras de reforma. Desta forma, durante as tres primeiras semanas de xullo a instalación funcionou con dous vasos operativos (pequeno e mediano), cun total de 585 usuarios nestas xornadas, aos que habería que sumar os 280 nenos que, de luns a venres, acudían ás piscinas como parte da programación do Campus Deportivo de Verán.
A apertura do vaso grande o 22 de xullo intensificou moito a asistencia ao recinto. Só entre esa data e o día 31 (10 días) foron 1.191 accesos, aos que hai que engadirlle os 250 campistas que usaron a instalación cada día en horario de mañá.
En agosto as altas temperaturas e a gratuidade das instalacións fixeron que moitos veciños escollesen as piscinas municipais, con xornadas que rexistraron picos de afluencia próximos aos 400 bañistas. As instalacións estiveron especialmente concorridas durante a primeira quincena do mes, aínda que o tirón se mantivo na terceira semana de agosto.
Aos 4.859 usuarios de agosto habería que engadirlle os 180 nenos que empregaron o recinto dentro do Campus Deportivo, todas as semanas e de luns a venres.
En setembro, coa meteoroloxía en contra, a situación mudou sensiblemente. A primeira semana a afluencia mantívose nunha media de 16 accesos por xornada. Desde os días nos que xa tocou a reincorporación ás aulas, a cifra quedou en pouco máis de media ducia.
En total, as piscinas rexistraron 6.492 accesos esta tempada, á marxe dos bañistas diarios do Campus Deportivo.