A Estrada prevé iniciar a nova fase de asfaltados no rural tras o verán
A ESTRADA
O alcalde da Estrada, Gonzalo Louzao, visitou as obras que está a executar Covsa, centradas na conservación e pavimentación de vías e camiños rurais dunha vintena de parroquias estradenses. Concretamente, o rexedor estivo a pé de obra en Santeles de Abaixo, onde puido comprobar a «boa marcha» dos traballos que levarán a cabo en dous plans que roldan os 800.000 euros.
A empresa adxudicataria realizar un plan de pavimentación que contempla obras en 15 vías de 11 parroquias cun presuposto de 600.000 euros. Inclúe actuacións en Couso (Souto de Vea), Cora (Carbia), Santa Cristina de Vea (A Costa, Tarrío, Sorribas e Igrexa), Santeles (Cruxeira, Pearo e Santeles de Abaixo), Berres (Servide), Orazo (Barro, Castrovite e Dornelas), Frades (Requián a Vilariño), Moreira (A Pía e o acceso a Igrexa desde a estrada provincial), Matalobos (Matalobos), Vinseiro (Freán) e Liripio (Igrexa).
A maiores, a compaña resultou tamén escollida para executar outro plan de conservación de camiños rurais, igualmente financiado cos fondos do plan +Provincia da Deputación de Pontevedra, que inclúe obras en 13 camiños doutras tantas parroquias: Couso (Couso), Cora (Vilacriste), San Xurxo de Vea (Guntín), Santeles (Santeles), Paradela (Aldea Grande), Riobó (Barcia e A Pena), Frades (Subión e Chaín), Barbude (Trasmonte), Rubín (Birbigueira), Guimarei (Guimarei), Lamas (Ou Rodo), Vinseiro (Freán e A Pena) e Codeseda (A Bugalleira).
«Os traballos estanse executando nunha época moi boa, o que lle confire unha durabilidade importante. Ao non estar o terreo con tanta auga compacta mellor e a aplicación do aglomerado en quente non atopa un contraste térmico», declarou o alcalde, quen lembrou que aínda está pendente a licitación e contratación de máis dun millón de euros en obras de mellora da rede rural que se sumarán a estas actuacións. «Agardamos que comecen despois do verán», indicou.
Louzao avanzou que o Concello está a traballar na elaboración dos proxectos de pavimentación para o 2026. Doutra banda, lembrou que está en proceso de licitación o plan de mantemento, que fará arranxos en 189 vías de 47 parroquias cun investimento de 200.000 euros.
«Daralle un repaso a todas as pistas que non se asfalten este ano», dixo