O Goberno de España notificou ás plataformas dixitais que anuncian pisos turísticos (como por exemplo Airbnb ou Booking) que deben retirar das mesmas a 1.249 pisos da provincia de Pontevedra. Por que? Porque o Ministerio da Vivenda considera que non cumpren os requisitos mínimos legais para poder ser incluídos no rexistro obrigatorio desde o pasado 1 de xullo para pisos turísticos, polo que constan como revogados.
O subdelegado do Goberno en Pontevedra, Abel Losada, falou do que isto supón: «A actuación do Ministerio de Vivenda de España en contraste co pasotismo ou, se se prefire, obstrucionismo da Xunta pondo coto ás disfuncións do mercado inmobiliario de alugueiro turístico é unha medida non só valente, senón pioneira en Europa e necesaria».
Desde o día 1 de xullo, os propietarios de todas as vivendas turísticas e de curta duración deben ter un Número de Rexistro Único (NRU) para operar legalmente en España. Isto hai que solicitalo ao Ministerio da Vivenda. Así o fixeron miles de propietarios de vivendas de uso turístico de toda Galicia, especialmente das Rías Baixas, que concentran gran parte deste mercado. Pero o ministerio non aceptou un total de 1.249 destas solicitudes, revogando o permiso a estes pisos.
Dous son os municipios máis afectados da provincia de Pontevedra por esta medida: Vigo e Sanxenxo. No caso vigués, revogouse o permiso a un total de 227 vivendas turísticas. En Sanxenxo, foron 196. Pontevedra é o terceiro, con 111 VUT (vivendas de uso turístico) revogadas e a partir de aí van Baiona (con 95) e Vilagarcía de Arousa, con 72. Paralizouse a inclusión nese rexistro de inmobles en boa parte dos municipios da provincia (un total de 50), incluso nalgúns diminutos e rurais como Portas.
Datos de Deza e Tabeirós
Respecto ás comarcas de Deza e Tabeirós-Terra de montes, revogáronse permisos a 24 VUT, con maioría na Estrada, con once, mentres foron cinto tanto en Lalín como en Silleda, dous en Cerdedo e unha en Vila de Cruces. Outras trece están activas de forma provisional.