O dianteiro de 19 anos procede do Sanse, de Segunda RFEF
29 ago 2025 . Actualizado á 05:00 h.O Estradense está a apurar ao máximo as súas opcións de contratación a pouco máis dunha semana da estrea ligueira. O conxunto rojillo, despois de asinar a Gerard Porto e Rodrigo Fernández, anunciou a chegada da oitava fichaxe do verán: Ian Tejero. Trátase dun extremo de 19 anos que vén apontoar o ataque rojillo despois da marcha de Gamarra, Jaichenko, Porrúa, Juanín e Diego Fuentes.
O futbolista debutou a pasada tempada en Segunda RFEF coa VDE Sanse, de onde procede. A metade de tempada, o canteirán do Atlético de Madrid foi cedido ao Tres Cantos, en Terceira madrileña. Como lle quedaba un ano de contrato e quería maior protagonismo para progresar, Ian Tejero falou co seu representante e puxo rumbo a Galicia.
«Non quería xogar 20 ou 25 minutos por partido e tampouco quería seguir na Terceira de Madrid, así que estiven a adestrar a pasada semana no Lugo B. Gustoume moito a experiencia, faláranme moi ben do fútbol galego, pero ao final non me puiden quedar en Lugo. O director deportivo axudoume e o meu representante falou co Estradense. A verdade é que me facía moita ilusión, quería estar nun equipo que aspirase a ascender ou que o expuxese», explica Ian.
O atacante puido disputar os seus primeiros minutos o mércores ante o Portonovo, sinalando que falou con Manuti e que este lle pediu maior profundidade e un para un. Ian Tejero defínese como un xogador veloz, pero tamén con capacidade para combinar. «Son moi eléctrico no un contra un, aínda que me gusta encarar tamén teño boa visión de xogo e último pase. Agardo mellorar día a día», confesa o mozo futbolista.