No pleno da Estrada tanto o PSOE como Móvete cuestionaron ao grupo de goberno do PP pola súa mala planificación coas obras do vaso grande das piscinas, que seguen en execución en plena tempada de baño. Ambas as formacións lamentan ademais que se reduzan as súas dimensións ou que se abrise o complexo en obras, ademais de pedir prestado «un socorrista a Cuntis porque aínda non foron capaces de contratalo». Desde as filas socialistas tamén criticaron ao rexedor por ser incapaz de xustificar a negativa para recuperar as bonificacións do campus deportivo de verán.
O grupo socialista abstívose na modificación da ordenanza do lixo, aínda que critican que se carece de criterio obxectivo para determinar onde se realiza recollida habitual, é dicir, con tarifa urbana, e onde non, a considera como rural. Aducen que noutros concellos como Lalín ou Ribeira si existen, e púidose utilizar o rueiro fiscal para esa clasificación ao identificar vila e parroquias. Cren que o cambio pode incluso facilitar a subida de tarifas.
Desde Móvete solicitaron que se intensifique a recollida de lixo nas zonas rurais, en especial na contorna de Pontevea. Tamén pediron a limpeza da contorna do antigo matadoiro, que ofrece unha imaxe lamentable cada vez con máis lixo, e preguntaron polo albergue.