A abstención do PP facilitou ao goberno socialista sacar adiante a modificación do contrato, co voto contrario do BNG, que pide outro modelo de xestión
01 dic 2023 . Actualizado á 05:00 h.A modificación do contrato coa UTE Silleda Sostible para incluír a recollida dos biorresiduos desde o día 1 de xaneiro, coa implantación do colector marrón que marca a lei, suporá un custo anual adicional de 48.331 euros. A aprobación dese acordo, así como da adhesión do Concello ao programa de reciclaxe das plantas de compostaxe de Sogama, lograba sacalo adiante o goberno socialista grazas á abstención do PP, posto que o BNG votou en contra. Incluso de mala gana houbo un agradecemento do rexedor, Manuel Cuíña, aos populares matizado con que exerceron de forma responsable cos veciños silledenses.
Antes de debaterse ese punto, o portavoz popular, Ignacio Maril, pediu á letrada da corporación que informase sobre unha posible incompatibilidade por parte do alcalde polas relacións comerciais que mantén nas súas actividades privadas cunha das empresas desa UTE. A secretaria faralle chegar ese informe a posteriori, pero non o fixo antes de debaterse ese asunto. A formación nacionalista mostrouse crítica coa forma de xestionar o tema dos residuos sólidos urbanos o PSOE, achacando as medidas xa aprobadas onte a unha saída doado que suporá subida de taxas aos veciños. Preguntou Erea Rey polos composteiros comunitarios que posibilitaba Revitaliza ou a maquinaria para tratar ese tipo de residuos que se prevía instalar en Área 33 pero rematouse renunciando a unha subvención de máis de 200.000 euros, lamentando que se pague a Sogama por unha materia prima en lugar de que xerase ingresos ao Concello.
Pero o BNG puxo o dedo na chaga noutra cuestión relativa ao contrato da recollida dos lixos, ao incidir en que non se cumpriu o prego respecto á renovación de máquinas e deberíase estar a penalizar á UTE con 6.000 euros mensuais, algo que non está a ocorrer.
Cuíña rebateu ao BNG que se non se chegaron a instalar composteiros comunitarios foi porque non se atopou localización idónea, tras o estudo efectuado por técnicas do plan Revitaliza. Sobre a renuncia á axuda para ese equipamento de tratamento de compost no polígono, que fose o primeiro en Galicia, aduciu que non se lle ía a fornecer en prazo para poder certificar o diñeiro recibido. E desvelou as conversacións mantidas co entón vicepresidente da Deputación durante o bipartito, César Mosquera, para que Silleda deixase de recoller lixo no rural nunha experiencia piloto que finalmente declinaron activar.
Respecto á falta de renovación de maquinaria pola concesionaria, o rexedor argumentou que está ao xustificar na falta de subministración polos provedores. A este respecto Maril insistiu en que se cumpra o contrato sen mirar para outro lado, como tamén o expuxeron desde o BNG. Incluso tachando de escandaloso que a pesar do caro do contrato non se estea reclamando o cumprimento do prego e por tanto o rexedor estea a renunciar de forma voluntaria a 72.000 euros para as arcas municipais. Cuíña dixo que se podería volver pedir a subvención para ese equipamento de compostaxe e que a UTE está a xustificar debidamente o atraso en renovar os camións.
Con argumentos similares pronunciábanse os tres grupos no punto da adhesión a Sogama, insistindo Cuíña en que era unha solución que ían adoptar todos os concellos galegos.
Adxudicar obras na Bandeira quedou para outra sesión
O grupo de goberno socialista prevía incluír por vía de urxencia a adxudicación a Coviastec, en 948.259 euros, a humanización da praza da Bandeira e a súa contorna ao ser a mellor das cinco ofertas presentadas á licitación. A documentación á oposición entregábase durante a propia sesión tras fotocopiarse á carreira. O rexedor aducía axustar dos prazos e evitar un novo pleno extraordinario para debatelo xa, pero nin o PP nin o BNG estiveron dispostos a iso, dado o calado do proxecto e o seu custo. Querían estudar antes con tempo o expediente. Cuíña decidía retirar o punto non sen ironía sobre a capacidade dos silledenses para pagar outro pleno.