Un Negreira moi efectivo no segundo tempo castiga ao Burela: 3-0

O Burela sufriu no desprazamento a Negreira a súa segunda derrota consecutiva nun gran partido no que a maior eficacia dos nicrarienses desequilibrou a balanza: 3-0.

Despois dun primeiro tempo moi igualado e de moito nivel futbolístico, no que ambos os equipos dispuxeron de varias ocasións para adiantarse no marcador, os locais fixérono finalmente tras o paso polos vestiarios. Corría o minuto dous do segundo tempo cando Adrián Pereira batía a Kiko por primeira vez e puña por diante ao líder do grupo Norte da Preferente. A pesar do golpe, os burelenses reaccionaron moi ben e tiveron unha ocasión moi clara nos pés de Diego Chao e tamén roldou o empate David Ben, pero os de Oke non aproveitaron as súas opcións e acabárono pagando posteriormente.

Quen non perdoaron case ningunha no segundo tempo foron os coruñeses, que no minuto 65 dobraban a súa vantaxe cun gran centro que cabeceaba a gol Gonzalo Suárez. Restaban 25 minutos para a conclusión e os verdes envorcáronse sobre a meta contraria en busca de reducir distancias e isto foi aproveitado polos de Negreira para trenzar unha boa contra e sentenciar o duelo por mediación de Peillet. Os mariñáns tiveron boas ocasións a través de Adri Kun e Jairo López, pero a súa falta de acerto privoulles de lograr un resultado máis axustado.

Con esta derrota o Burela colócase sétimo, pero igualado a 21 puntos con Betanzos e Sofán, que ocupan a quinta e a sexta praza, respectivamente. Os verdes recibirán o vindeiro domingo na Marosa (16 horas) a un Lalín que acumula seis puntos máis que os mariñáns.

---

---

---