O Baxi Ferrol cae con todo o equipo fronte ao SPAR Gran Canaria (93-81)

Sen antídoto para un correcalles infernal e unha incontestable Merceron. O Baxi Ferrol caeu con todo o equipo nA Paterna fronte a un SPAR Gran Canaria (93-81), que celebrou a súa primeira vitoria do curso á conta do cadro naval. As de Lino López, que se deixaron levar polo correcalles imposto polas locais, non foron capaces de levantarse cando tocaba nun choque no que — fóra de Melia— renderon por baixo do seu nivel. Cinco derrotas e só tres vitorias na liga Feminina Endesa para as mosqueteiras, que deben reaccionar para non meterse nunha lea clasificatoria.

Final do partido nA Paterna. pic.twitter.com/llslnbtcwl

— Baxi Ferrol (@UniFerrol) November 30, 2025

Con Erjavec comandando en territorio coñecido, arrincou o Baxi Ferrol como mandan os canons para un parcial de 0-5. Como un flan mostráronse as canarias, que erraron un pase doado e propiciaron outra canastra máis.Parou José Carlos Ramos e de nada serviu o tempo morto porque Millán, a golpe de triplo, pronto colocou ás súas con catorce puntos. Mercerón, a conta gotas, logrou reconectar ás súas.

Cinco arriba para o Baxi e as locais abríndose paso en transición rápida. Richardson, de tres, recortou a dous e acendéronse as alarmas das mosqueteiras. A conquista da illa non ía ser un paseo e afanouse Sotolová en tomar a vez de Millán como francotiradora desde a liña de tres para evitar sufrimentos e pechar os primeiros dez con dez de renda nA Paterna.

Iniciouse o segundo cuarto cunha acción de 2+1 de Mercerón e tirou de garra Elena Rodríguez para birlar un balón e seguir sumando puntos nun auténtico correcalles a ambos os dous lados do parqué, que beneficiou ás de casa. Só dous puntos de saldo e Lino López buscando osíxeno a golpe de tempo morto. Cun parcial de 19-5 e o marcador en contra por primeira, tocaba ás galegas emendar a plana de cinco minutos para esquecer.

Marabilla Joiner quentou a boneca para rescatar ás súas da ansiedade, pero Mercerón non afrouxaba nas filas rivais e un novo triplo liberado de Richardson colocaba ás súas seis arriba. Arrancada ferrolá, 52-50 no marcador e o debe de blindarse atrás e rebaixar os niveis de anotación canarios.

Despegar ou sufrir

Continuación, cun SPAR Gran Canaria que logrou porse a doce en apenas tres minutos. Pintaban bastos, cun Baxi metido na espiral de moitas canastras e pouca brega que tan pouco lle favorece ao cadro naval. 18-4 no parcial e as mosquereras reducidas á mínima expresión sen remedio aparente. Comandou a reacción Joris cun catedralicio triplo e, cunha ducia de terra polo medio, que foron recortando a duras penas ata os nove as ferrolás.

Dez minutos decisivos para amarrar unha necesaria cuarta vitoria e, sobre todo, recuperar a esencia dun Baxi completamente esvaecido. Melia e Daniels, as dúas torres, como máximo expoñente de anotación. Precisamente, a guerreira irlandesa sumou un crucial 3+1 que situaba ás súas a seis. Mesma resposta de Richardson e a cousa póndose seria de verdade. Máis de Melia, con Sotolová e o seu tino exterior como complemento perfecto para situarse a cinco

Con Merceron como incontestable bastión canario, os intentos do Baxi Ferrol quedaron niso. En intentos, que non evitaron unha derrota das que fan ferida e que esixirá ao cadro ferrolán un labor de equilibrismo para que o torrente de xogo europeo trasládese tamén a territorio nacional. 

---

---

---