Izan rescata un punto para o Burela cun gol a tan só unha décima da conclusión: 2-2

Un tanto case sobre a bucina de Izan serviulle ao Burela FS para manterse invicto en Vista Alegre na Segunda División masculina e rescatar un punto a tan só unha décima do final ante un Inagroup El Ejido (2-2) que demostrou un gran nivel na súa visita á Mariña. O peche vigués dos mariñáns foi o gran protagonista do choque, xa que os seus dous goles no tramo final servíronlle aos de David Rial para igualar o 0-2 co que se puxeron os almerienses no minuto 35.

O conxunto visitante foi mellor nun primeiro período no que tivo boas ocasións ante a meta defendida por Starna, pero non foi capaz de concretar ningunha delas. Beto púidoo facer no minuto 5, pero se atopou primeiro con Marquinho e despois co porteiro arxentino.

Starna volvía aparecer no novo para despexar coa cara un remate de socato de Adri Mora tras un gran servizo desde a á dereita de Josete e no 16 facíao de novo para tocar o xusto un disparo de Vacas, que se atopou cun balón morto na frontal.

Os mariñáns só inquietaron a Jesús no tramo final do primeiro tempo nunha deixada de Pitero para Charly, pero o potente remate do coruñés íase lixeiramente alto.

Mellorou o cadro burelense no segundo tempo, onde tivo moita máis presenza en campo contrario. Izan probábao primeiro desde uns nove metros, pero Jesús respondía cunhas boas mans e logo volvía intervir á saída dun córner ante Pitero. O capitán intentaríao outra vez no minuto 23, pero o seu disparo íase por moi pouco e repetía tres despois nunha grande acción no pivote. Virábase moi ben, pero outra vez localizaba demasiado alto o seu remate.

Os discípulos de David Rial dominaban neste tramo de partido e volverían ter outra grande ocasión nas pernas de Alberto, pero o seu pase da morte para Jason era cortado por Pope.

Cando mellor estaban os locais, unha segundo amarela innecesaria de Jason enviaba á ducha ao de Mataró a once minutos e medio da conclusión e deixaba en inferioridade aos mariñáns. Non o desaproveitaban os de Guille Martínez, que marcaban en superioridade por mediación de Rosa, batendo por baixo ao seu compatriota Starna.

E Izan elixiu devorar o parqué

IVÁN ROLLE

O meta evitaría o segundo, nunha dobre intervención ante Adri Blat e Vacas, pero podería facer algo máis no 35, cando se lle escorría entre as mans un disparo de Pope que significaba o 0-2.

Vista Alegre tocou a rebato, Rial ordenou que entrase Alberto de porteiro-xogador e Izan reducía distancias no 36 cun zapatazo desde uns doce metros que se coaba pola escuadra.

Os ejidenses tiveron un par de balóns a porta baleira nos pés de Nacho Gil e Josete para sentenciar, pero non o fixeron e Izan penalizounos resolvendo unha acción embarullada na área dos visitantes e levando o xúbilo ás bancadas do Vista Alegre.

---

---

---