Este sábado debutará en Terceira Autonómica en Meira co obxectivo de ir partido a partido e consolidar o seu proxecto a longo prazo
16 oct 2025 . Actualizado á 19:19 h.«Despois de moitos anos de ausencia nas competicións», Burela recupera por fin ao seu equipo sénior de baloncesto masculino. O seu máximo responsable técnico é Manolo Cobas, toda unha institución neste deporte na Mariña que militou no propio equipo burelense, o Celtas de Foz e o Viveiro e leva varios anos coidando ás novas promesas como adestrador. Por problemas coa tramitación das fichas, comezarán a competición na Terceira Autonómica cunha semana de atraso medíndose en Meira na xornada dúas ao Naturleite Vila de Meira (sábado, 20 horas).
«Xa tíñamos categorías inferiores, pero, tras varios anos sen equipo sénior, este ano lanzámonos a crealo», contou quen xa nunha etapa anterior dirixiu ao primeiro equipo do CB Burela. Os seus pupilos arrincan desde a última categoría e co hándicap das dificultades para atopar xogadores que este curso impediron saír a competir ao Viveiro na Primeira Autonómica, onde o Celtas de Foz manterase agora como única esperanza mariñá: «Sempre é complexo o inicio, e máis pa xuntar xogadores nesta categoría, xa que a maioría están estudando ou traballando fóra».
Segundo admitiu Cobas, o desafío, por amais dos resultados, será construír un proxecto sostible a longo prazo: «O que queremos é iniciar un proxecto duradeiro, que se afiance e que se manteña no tempo. Consolidar o equipo. Nesta primeira tempada ese é o obxectivo. Queremos mellorar pouco a pouco, sen aspiracións de ascenso nin nada polo estilo. Se ben, por suposto que iremos a por todas, sen renunciar a nada».
«A maioría dos nosos xogadores son da propia vila de Burela, de Viveiro e do resto da comarca», explicou o adestrador dun persoal que custou confeccionar, pero por fin parece lista para competir na división máis humilde do baloncesto galego. «A pasada semana xa empezou a liga, pero nós aprazamos o noso encontro, que tiñamos que xogar contra o Narón, porque aínda estabamos en trámites coas fichas. Esta semana, se solucionamos todo o tema de fichas e demais, xogaremos o sábado día 18 en Meira ante o cadro Naturleite Vila de Meira, ás 20 horas, un encontro que xa é da segunda xornada de competición», detallou Manolo Cobas sobre un equipo que deberá superar o hándicap de arrincar sen disputar ningún partido de pretemporada e que só pode adestrar ao completo os venres polas dificultades laborais e académicas dos seus xogadores.
O persoal
Aínda pendentes de completar o seu conxunto, polo que poderían producirse entradas e saídas, Cobas conta cos bases Cristian e Pablo Anido; os escoltas Ángel Cayón, Raúl Cayón e Ángel Iglesias; os aleiros Pablo Rivas e Samuel; os á-pivotes Luis, Mario e Diego; e os pivotes Miguel Rivas e Hugo.