Marqueta para un penalti á Ponferradina e convértese, de novo, no heroe do Pontevedra (0-1)

Visitar o Toralín no primeiro desprazamento da tempada era, a priori, unha saída complicada. Unha bancada que aperta e un equipo chamado a estar na pelexa polo título que chegaba despois de golear na primeira xornada. Ese era o punto de partida co que desembarcaba o Pontevedra en Ponferrada, pero só deu un cuarto de hora de cortesía aos locais para que se situasen no campo. A partir de aí, o duelo foise equilibrando ata ceder o control aos de Rubén Domínguez, que xogou con Selma na punta de ataque apoiados por Alan Ribeiro e un Yelko Pino de ligazón que foi capaz de xerar perigo á portería de Ángel.

A Ponferradina intentaba levar o control de balón para marcar o ritmo con accións que construían desde atrás. Buscaba romper o partido cun gol madrugador e desfacer ao rival antes case de arrincar. Funcionoulle en Avilés, pero este sábado non lograban facer sufrir aos granates, que gañaron confianza e non deixaban espazos dentro da área. As xogadas a balón parado, con ata cinco saques de esquina na primeira parte, marcaron as escasas accións de perigo dos locais. Todas as oportunidades que se viron neses primeiros minutos desvanecéronse e a verticalidade que buscaba a Ponferradina perdíase no medio campo. O Pontevedra respondía gañando profundidade pola esquerda cun Álex González, que intentou meter balóns á frontal da área para buscar os pés (ou a cabeza) de Ribeiro. Os granates convertéronse nos donos do Toralín para augar aos locais as festas patronais de Ponferrada. Sacudiuse o medo escénico co que arrincou, aínda que lle custaba finalizar. A segunda parte arrincou aberta para ambos os equipos, pero non pasaran nin cinco minutos cando o Pontevedra perdeu a Videaorreta por lesión. Foi o primeiro contratempo para os granates, que minutos despois quedaba tamén sen Miki Bosch. Rubén Domínguez optou por mover o esquema e facer un dobre cambio ao sacar a Luisao e Adrián Expósito. A partir de aí, o partido acelerouse e favoreceu aos intereses granates.

O adestrador da Ponferradina, Fernando Estévez, que non recoñecía ao seu equipo nO Toralín, pediu un triplo cambio para reforzar a ofensiva e remodelar o esquema de xogo para intentar dar a sorpresa. Pero a sacudida non lles valeu aos locais, que viron como Alain Ribeiro traspasaba a portería de Ángel cun centro de Luisao. Rematou de cabeza para adiantar aos pontevedreses e sacouse as espiña dunha ocasión errada que minutos antes deixábao tendido na área pequena.

Acelerón da Ponferradina

A Ponferradina meteu unha marcha máis tratando de empatar o partido nos últimos minutos. E de novo, o Pontevedra atopou nas mans de Marqueta ao seu salvador. Se na primeira xornada, o porteiro marcou o gol do empate, nO Tolarín parou un penalti polémico, que concedeu o colexiado tras revisar a xogada. Pena máxima e segundo amarela para Montoro, que deixaba aos granates en inferioridade no campo, pero non no xogo. Os de Rubén Domínguez eran donos e señores en terras bercianas. Nin os 14 minutos de desconto foron suficientes para os locais, que xa xogaban á desesperada para dar a volta a un marcador desfavorable co que non contaban ao arrincar.

O Pontevedra suma a súa primeira vitoria na segunda xornada de Primeira Federación e ten un novo heroe, que se axiganta baixo paus. Xa sexa para marcar ou para parar.

---

---

---