O filial feminino do Burela FS tamén botou a andar esta semana con Mario Pillado á fronte
DEPORTES
Outros sete conxuntos da base laranxa comezaron esta semana o seu traballo de pretemporada
22 ago 2025 . Actualizado á 20:28 h.O filial do Burela FS feminino, que este curso competirá en Primeira Futgal, e outros sete conxuntos da base laranxa comezaron esta semana os seus adestramentos de pretemporada.
A cargo do filial, que perdeu potencial deportivo debido a que cinco das súas mellores pezas ascenderon ao primeiro equipo, estará Mario Pillado, que regresa á estrutura do club burelista para suplir ao coordinador da base feminina e novo segundo adestrador do conxunto de Primeira Iberdrola, Jairo Campo. «O obxectivo non é outro que ter un grupo de rapazas preparadas para que, de ser preciso, Belén Feal poida botar man delas e estean a un nivel axeitado tanto de adestramento como para participar nos partidos», explica Pillado.
As mozos promesas laranxas comezaron a pretemporada cunha reunión nos murais de 'Burela, ou mar e as súas xentes', nos que o seu novo técnico falou sobre «o prometedor futuro da nosa base e do crecemento exponencial da canteira feminina nestes últimos anos», explican desde o club. Na cita tamén estiveron presentes o delegado do equipo, Cándido Eijo; o coordinador feminino, Jairo Campo; o presidente da entidade, José Luis Sáez; e os directivos Luis Guillén, María Otero e Yago Pernas.
Posteriormente, Pillado invitounas a unha merenda no Boas Faragullas e despois trasladáronse ao pavillón de Vista Alegre, onde realizaron a primeira sesión da pretemporada baixo a atenta mirada da adestradora do primeiro equipo, Belén Feal. «Belén xa estivo en varios dos adestramentos e coñeceu o grupo, algo que lle agradecemos moito porque, aínda que debera ser o lóxico, non sempre foi o normal neste club. Conseguir que as rapazas estean listas para dar o salto ao primeiro equipo non é un obxectivo sinxelo porque son moi novas, pero teño plena confianza nas rapazas que conforman o grupo e creo que o poderemos alcanzar», sinala o novo preparador do filial.
Unha das primeiras citas do segundo equipo laranxa será o próximo 7 de setembro nos cuartos de final de cuarta Copa Deputación ante A Lendra Castroverde FS. O pase ás semifinais decidirase a partido único.
Máis de 160 integrantes
A base do Burela FS segue gozando de boa saúde e está confirmada xa a matrícula de máis de 160 xogadores e xogadoras de todas as categorías. Moitos destes futbolistas xa deron comezo tamén ás súas respectivas pretemporadas esta semana. Trátase dos equipos infantís, cadetes e xuvenís, tanto masculinos como femininos. A escola laranxa contará con dous equipos na categoría infantil masculina, polo que son sete os conxuntos que xa arrincaron a súa posta a punto e ningúns xa contan con compromisos deportivos á vista.
Os cadetes e os xuvenís masculinos viaxarán a próxima fin de semana a terras valisoletanas para disputar o sábado 30 e o domingo 31 de agosto o Torneo Nacional Ciudad de Valladolid. O encargado de guiar este ano aos xuvenís será o mozo Miguel Rodríguez, mentres que nos cadetes repetirá o experimentado e laureado Javier Pardeiro.
Mentres, os conxuntos femininos desprazaranse a Cantabria o 13 e 14 de setembro para tomar parte no torneo que organiza o Muslera de Guarnizo. A cargo das xuvenís estará Mario Pillado, as cadetes serán dirixidas por Míchel Couceiro e o técnico das infantís será Miguel Rodríguez.