Pablo Graña gaña a súa semifinal e estará na final do C1 200 dos Mundiais de piragüismo
DEPORTES
Manu Fontán rozou a clasificación no C1 500 despois de ser cuarto a dúas décimas do terceiro, o grego Dimopoulos
21 ago 2025 . Actualizado á 16:04 h.O padeeiro cangués Pablo Graña logrou este xoves o pase á final A do C1 200 nos Mundiais de piragüismo que se están celebrando no Idroscalo Park de Milán (Italia), mentres que o pontevedrés Manu Fontán quedou ás portas de lograr a clasificación en C1 500.
Nunha xornada que finalizou antes de tempo a causa dunha tormenta de saraiba durante as probas de paracanoe e que contou con escasa participación galega, destacou o bo papel de Pablo Graña na semifinal 2, na que conseguiu cruzar a meta en primeiro lugar, asegurándose un posto na final do C1 200 que se disputará este venres (15.40 horas, Youtube Canoe Planet). O galego parou o crono en 38,75 segundos, a marca máis rápida da proba nestes Mundiais superando ao uzbeko Artur Guliev, segundo, en 61 centésimas.
Tamén saíu á canle Manu Fontán, que na súa quenda de clasificación do C1 500 finalizara quinto. Na súa semifinal, o pontevedrés quedou ao bordo da clasificación á final A despois de finalizar en 1.49,93, a tan só dúas décimo do terceiro clasificado, o grego Stefanos Dimopoulos. Así, o galego competirá na final B este venres (14.25 horas, Youtube Canoe Planet).
Tres finalistas máis
Máis aló dos galegos, a delegación española logrou a clasificación de tres botes máis ás finais A das súas respectivas categorías. Joan Antoni Moreno e Diego Domínguez estarán na loita polos metais en C2 500; Sara Ouzande, Lucía Val, Estefanía Fernández e Bárbara Pardo en K4 500 e Laura Pedruelo en K1 1.000.
Moreno e Domínguez foron primeiros da súa proba de forma autoritaria por diante dos xermanos Nico Pickert e Conrad-Robin Scheibner, aos que avantaxaron en 1.24, e postúlanse como claros aspirantes ao podio. Domínguez asegurou tras a proba que tiveran «boas sensacións». «Gañamos con certa solvencia ao barco alemán e temos moitas ganas de chegar a esa final que levamos tanto tempo preparando e a loitar polo ouro».
O K4 500 feminino cumpriu sobradamente. Sara Ouzande, Lucía Val, Estefanía Fernández e Bárbara Pardo, vixentes subcampioas continentais, impuxéronse na súa semifinal con 65 centésimas de vantaxe sobre China. Laura Pedruelo, bronce continental, distanciou aínda máis en K1 1.000 á ucraína Mariya Povkh —1,66 segundos—.
O K4 masculino, a polo ouro
Este venres comezarán as finais, nas que estará o K4 500 masculino (15.11 horas, Youtube Canoe Planet) de Adrián del Río, Álex Graneri e os galegos Carlos Arévalo e Rodrigo Germade. Farán o propio o K4 500 feminino, o C2 500 feminino, o K1 1.000 feminino e o C1 200 de Graña.