A ximnasta de Ponteareas acaba terceira na final de dobre mini tramp nos Xogos Mundiais ao sumar 26.900 puntos nun salto
11 ago 2025 . Actualizado á 08:49 h.Melania Rodríguez fíxose co bronce na proba de dobre mini tramp de ximnasia artística nos Xogos Mundiais, que se disputan en Chengdú (China). Fíxoo, ademais, cunha nova marca mundial da disciplina, realizando a pirueta barani carpa tripla na final. Esa aposta serviulle para lograr o salto de máis puntuación de todas as finalistas, pero aínda así, a ximnasta de Ponteareas tívose que conformar coa medalla de bronce (26.900 puntos), completando un podio que encabezou a portuguesa Diana Gago, por diante da estadounidense Grace Harder.
A deportista do Ximnasia Pontevedra acudía á cita da China co claro obxectivo de volver a casa cunha marca mundial no seu salto. Melania superou a primeira criba sen dificultade, cunha puntuación de 52.000, pero na semifinal viuse penalizada por un erro que a apartou da carreira polo ouro e púxoa no horizonte do bronce. Nese contexto, a ponteareá quixo asegurar o podio co seu estratosférico salto para acadar os 26.900 puntos, nova marca universal por unha décima.
Nove medallas mundiais
Para Melania Rodríguez, a de China é a segunda medalla nuns Xogos Mundiais, a anterior fora de ouro, e a novena nunha cita internacional. A galega foi campioa do mundo no 2023 e de Europa un ano despois, ademais de selo tamén por equipos na modalidade de trampolín.
O éxito en China chégalle a Melania Rodríguez nun ano difícil, despois de perder ao seu adestrador, Pablo Hinojar, falecido en outubro do ano pasado aos 49 anos de idade cando descansaba nun hotel en Madrid, cidade á que acompañara a Melania para tomar parte dean unha competición.
A ximnasta considéraa o seu pai deportivo e cara a el sempre ten un recordo especial. «Estamos a dar cana aos adestramentos, vai por min e vai por Pablo, teño máis ganas de conseguir obxectívooss que os dous nos propuxeramos», comentou a La Voz este mesmo ano. Un deses obxectivos caeu onte na China en forma de marca mundial cunha pirueta cargada de dificultade tan só ao alcance das mellores. Melania é unha delas.