O de Viveiro, favorito ao ouro, foi segundo nunha carreira lenta na que aforrou todas as súas enerxías
02 ago 2025 . Actualizado á 12:21 h.Adrián Ben levantouse ás sete e media da mañá para que a terceira serie das semifinais do 1.500 do Campionato de España non lle collese durmido. E o atleta de Viveiro, nunha carreira extremadamente lenta non fallou e entrou segundo (pasaban catro por postos) sen gastar forzas. A marca: 4.05.70, un rexistrou que queda en anécdota porque o importante chegará na mañá do domingo coa final.
O atleta de Viveiro controlou a carreira ao seu antollo. Púxose a cola de pelotón na primeira volta, pegou un cambio para porse no grupo cabecero con toda facilidade e despois deixouse levar a un ritmo moi lento sabedor de que o tiña todo controlado. Na última volta, pegou un acelerón ao que só respondeu Javier Mirón e Eric Guzmán, que acabou gañando a serie mentres o galego dedicábase a mirar cara atrás para confirmar a súa presenza na final co depósito de forzas cheo. Está nun excelente momento.
Ben está a volver aos 1.500 metros, a proba na que comezou a despuntar no mundo do atletismo, aínda que os seus mellores días a nivel internacional chegaron nos 800 metros. Esta tempada, o galego confesou que necesitaba un cambio e no milqui está a asinar unha excelente campaña, alcanzand a súa mellor marca persoal na distancia (3.32.07). Un ano que debe culminar coa súa presenza no Mundial de Tokio de setembro, cuestión que debe ratificar na mañá do domingo na final do estatal que se celebra en Tarragona.