A campioa de Europa de triplo salto anunciou hai apenas un mes que estaba embarazada por segunda vez da súa parella, Benjamín Compaoré
25 jul 2025 . Actualizado á 09:24 h.A atleta Ana Peleteiro perdeu o fillo que agardaba xunto á súa parella, Benjamín Compaoré. A atleta galega comunicouno a través das súas redes sociais: «Hoxe tivemos que pasar por un dos momentos máis agridoces da nosa vida, pero o afrontamos fortes e máis unidos que nunca». Fai menos dun mes que a campioa de Europa de triplo salto —que xa é nai da pequena Lúa— anunciaba o seu embarazo.
A de Ribeira explicou agora que a pesar de que todo transcorrese dentro da normalidade ata a sétima semana de xestación, na última revisión xa non escoitaron o latexado do bebé. «"Mozos, séntoo moito, pero a pesar de levar un crecemento normal, non temos latexado…" Probablemente sexan as palabras que xamais queres escoitar e menos aínda cando parecía que todo ía ben despois de escoitarlle o latexado na semana 7 e sentir como cada día ía crecendo pouquiño a pouco sen ningún tipo de problema», relatou.
«Agora toca pasar por un proceso duro e doloroso, pero que sabemos que superaremos e que nos fará máis fortes», escribiu a deportista olímpica nunha mensaxe que remata así: «Desde hoxe temos un angelito máis no ceo que nos coida e protexeranos o resto da nosa vida».
O anuncio, hai tres semanas
Foi o pasado 6 de xullo cando a atleta anunciaba —tamén a través das súas redes sociais— o seu embarazo. Facíao cunha publicación xunto ao seu marido, Benjamín Compaoré, e a súa filla Lúa: «Aínda non sabemos case nada de ti, hijito, pero te amamos e desexamos con todo o noso corazón», escribía. Días máis tarde, subiu unhas historias nas que explicaba como recibiu a noticia de volver ser nai, xa que «non foi un bebé buscado». Confesou entón pasar unhas semanas «complicadas» polo shock da noticia: «Tiven que traballalo co meu terapeuta». Aínda que, recalcou: «Un embarazo sempre é unha noticia marabillosa. Levabamos dous meses de malas noticias e desde que sabemos que estamos embarazados todo cambiou».