O Viveiro CF ata tres fichaxes e dúas renovacións máis para o seu novo proxecto en Terceira
DEPORTES
Lautaro Garelli, Hugo Parra e Jacobo Folgar poranse ás ordes de Luchi Salgueiro nun equipo que tamén retén a Peli e Víctor
02 jul 2025 . Actualizado á 05:00 h.O proxecto co que o Viveiro CF competirá por sexta tempada consecutiva en Terceira Federación vai tomando forma. Nos últimos días, a entidade presidida por Luis López del Río asegurou outras tres fichaxes e dúas renovacións para dispor xa de once pezas ao servizo de Luchi Salgueiro cando comecen a pretemporada a principios de agosto. Ás xa anunciadas continuidades de Rolle, Arturo, Xoel Rodríguez, Álex Esquerdeiro e Carlos Teixeira, súmanse a centrocampista Peli e o defensor Víctor Fernández, mentres que Lautaro Garelli, Hugo Parra e Jacobo Folgar acompañan no capítulo de altas a Yago Cruña, o dianteiro que o pasado curso anotou 17 goles co Lourenzá en Primeira Futgal.
Hugo Parra Villar é un porteiro do 2005 que procede do Atlético Bembibre e tamén pasou pola canteira da Ponferradina. A pesar de ter ficha do filial, na súa primeira campaña tras saír de xuvenís disputou catro partidos completos no grupo castelán e leonés de Terceira Federación.
Tamén é unha importante aposta de futuro o defensa central do 2006 Jacobo Folgar Cedrón, unha das pezas máis importantes dun Compostela xuvenil que callou unha notable tempada na División de Honra. Durante a súa etapa de formación tamén pasou polo Xuventude Oroso, o Deportivo e o Arousa.
Mentres, o arxentino Héctor Lautaro Garelli, que cumprirá 23 anos o próximo mes de setembro, é un lateral destro con experiencia na categoría, xa que defendeu a camiseta do Arzúa na segunda metade do curso 2023-24. Saído das canteiras de Talleres e Vélez Sarfield, tamén militou no Dacia Unirea Braila romanés e os italianos Ángelo Cristófaro e Melfi 1929, o seu último equipo ata o momento.
Entre os renovados, o valisoletano Alberto Rodríguez, Peli, de 33 anos, chegou no mercado invernal e foi clave para acadar a permanencia, participando como titular nas 15 últimas xornadas. Algúns problemas físicos privaron de máis continuidade ao central ou lateral destro leonés de 26 anos Víctor Fernández, que sumou 1.399 minutos e un gol.
Lombao, ao Arousa
Tamén son unhas cantas as saídas confirmadas xa polo principal expoñente do fútbol mariñán. Onte confirmouse a fichaxe do extremo Adrián Lombao polo Arousa, Lucas Fanego xogará no Somozas, Diego Fernández, un dos capitáns, fichou polo Pol e o goleador Diego Santín, á falta de oficialización, apunta ao Barco. Tampouco continuarán no Viveiro o porteiro polaco Patryk, o centrocampista guineano Lamíne Sylla nin o lateral leonés Herrador.