O conxunto gunner, renacido da man do técnico español, regresa á fase eliminatoria da Champions sete anos despois co rochoso Porto como escollo
20 feb 2024 . Actualizado á 19:30 h.Houbo un tempo no que o Arsenal era un fixo na fase eliminatoria da liga de Campións. Aquela época dourada no club londiniense acabou co final da exitosa etapa con Arsène Wenger no banco e os tempos de viño e rosas deron paso a unha era máis mundana, coa Europa League como emprazamento habitual.
Sete longos anos pasaron desde que os gunners disputaron por última vez os oitavos de final da vella Copa de Europa, polo que o seu regreso entre os mellores equipos do vello continente marca un fito para Mikel Arteta, o home que comandou a reconstrución do club. Instalado outra vez entre os candidatos para conquistar a Premier League inglesa, a eliminatoria europea ante o rochoso Porto será unha sorte de reválida para un proxecto consolidado na competición doméstica.
Hai ganas de ver en Europa a este Arsenal que sostén o pulso ao Liverpool e o Manchester City no campionato inglés. Bukayo Saka é o xogador máis determinante do ataque gunner, un coleccionista de goles -seis no últimos catro partidos- e asistencias que achega a vertixe a un equipo estruturado desde a medular comandada por Declan Rizar, na contención, e Odegaard, o centrocampista creativo.
Enfronte un Porto máis prosaico, pero sempre sólido en competición europea. Moi lonxe do Benfica na pelexa polo título da liga portuguesa, o equipo de Sérgio Conceição aspira a dar a sorpresa e acadar esa rolda de cuartos que foi o seu tope histórico desde o xa afastado título de hai dúas décadas.
Aliñacións probables
Porto: Diogo Costa, João Mário, Pepe, Otávio, Wendell, Varela, Nico González, Galeno, Pepê, Francisco Conceição e Evanilson.
Arsenal: Raia, White, Saliba, Gabriel, Kiwior, Odegaard, Rice, Havertz, Saka, Martinelli e Trossard.