A análise de Fernando Rey Tapias: chegou a hora da verdade para Carlos Alcaraz en Melbourne
DEPORTES
O español mídese hoxe a Zverev en cuartos de final do Open de Australia
23 ene 2024 . Actualizado ás 19:21 h.O Open de Australia adoita ser un torneo con rechamantes sorpresas, dadas as características da difícil adaptación aos horarios, a extrema meteoroloxía e o ser o primeiro torneo da tempada. Pero nesta edición os primeiros clasificados cumpriron coa súa situación no ránking, e iso trae como consecuencia que entre os oito cuartofinalistas masculinos estivesen os seis primeiros cabezas de serie, moitos deles, como é o caso de Carlos Alcaraz, sen ter que realizar grandes esforzos, nin xogar o seu mellor tenis para chegar a unha rolda que lle permite entrar entre os catro xogadores máis novos en acadar os cuartos de final dos catro grand slam, xunto a Djokovic e tras Nadal e Boris Becker.
Un cadro cómodo
O español tivo un cadro cómodo, superando con claridade a Gasquet, ao chinés Shang, e a Kecmanovic, sendo o italiano Sonego o único que lle obrigou a xogar ao seu mellor nivel. Carlos ha ir de menos a máis, e en oitavos ante Kecmanovic mostrou un excelente estado de forma, cun ton físico envexable. Ese ton físico é o que lle pode pasar factura ao seu rival, o alemán Zverev (10.30 horas, Eurosport), que tivo que superar dous partidos a cinco sets ante Klein e Norrie, o que supón ter estado case cinco horas en pista máis que Carlos.
Analizando o que pode dar de si esta primeira proba importante de Carlos se pretende gañar, temos os antecedentes do cara a cara entre ambos, favorable a Zverev por 4-3. Coa última vitoria do xermano no Nitto ATP Finals, e igualados en enfrontamentos de grand slams, con vitoria de Alcaraz no US Open 2023 e derrota do murciano en París 2022.
O servizo do alemán
Ambos se coñecen perfectamente, e son conscientes dos puntos fortes dos seus rivais. As posibilidades do alemán pasan inexorablemente polo seu saque. Se ten un bo día, é moi complicado romperlle. Se non, Carlos terá oportunidades de atacar os segundos saques. Outro aspecto que o español haberá de ter en conta é que o alemán ten unha luva no revés, que domina á perfección, tanto cruzado como paralelo, polo que Alcaraz, que está acostumado investirse de dereita e atacar o revés do seu rival, haberá de cambiar en ocasións, e comezar atacando cara á dereita do opoñente.
Coller a iniciativa
Hai outros aspectos fundamentais no desenvolvemento do partido: o primeiro, que o español consiga facerse coa iniciativa, e así poder despregar todas as variacións do seu xogo, incluíndo voleas e deixadas, castigando o físico do alemán, ao que lle custa correr cara a adiante, e que, ademais, na rede non se sente excesivamente cómodo. O segundo é que o murciano xogue moi concentrado nos puntos de break que consiga, xa que o saque do alemán non lle vai a dar moitas oportunidades e será moi importante que as aproveite. No partido de Turín, por exemplo, só converteu un de seis.
En resumo, o torneo entra na segunda fase, cuns cuartos moi atractivos, nos que Alcaraz ten un difícil rival, nun partido no que o confiamos que o físico, a iniciativa e a variedade do español, supere ao temible saque do alemán, para poder xogar a semifinal ante o vencedor de Medvedev e Hurkacz.