A destitución de Setién e a convocatoria de eleccións son parches que non fan máis que evidenciar a crise global dun Barcelona que non se ía sen carga en títulos desde a tempada 2007-08
18 ago 2020 . Actualizado á 13:53 h.Días movidos en Can Barça. A recente destitución de Quique Setién e a convocatoria das eleccións á presidencia no mes de marzo do 2021 son parches que non fan máis que evidenciar a profunda crise que vive o Barcelona en todos os seus estamentos. A afección pedía a cabeza do presidente, Josep María Bartomeu, tras o desastre da Champions League, unha derrota que supuxo o broche dunha tempada para esquecer, pero o presidente decidiu esgotar o último de ano do seu mandato.
Sen ningún título debaixo do brazo por primeira vez desde a tempada 2007-08, o que supuxo a chegada de Guardiola, Bartomeu enfróntase a unha necesaria remodelación do club a todos os niveis, empezando pola propia directiva. Desde o seu nomeamento como presidente no 2015, a débeda do Barcelona non fixo máis que dispararse a pesar de que concluíu cada ano en saldo positivo. Unha débeda neta —diferenza entre o que debe fronte ao que lle deben— que este ano alcanzaría os 650 millóns de euros segundo o diario Sport, a pesar de obter uns ingresos de case 1.000 millóns de euros durante o pasado curso.
Só en traspasos o FC Barcelona embolsouse 640 millóns de euros durante a era Bartomeu, —222 deles na venda de Neymar ao PSG— e aínda así non conseguiu evitar que a débeda se desmadrase. Especialmente nos últimos anos, xa que a pesar de facer caixa coa saída de importantes figuras, Bartomeu dilapidou todos eses ingresos en fichaxes non rendibles e en renovacións millonarias aos xogadores con máis soleira do club, as coñecidas como vacas sacras. Xogadores que poderían ter os días contados no club, xa que a idea da dirección deportiva é facer unha ampla reestruturación do primeiro equipo. Unha rexeneración que pasaría por facer caixa coa venda dos máis veteranos e así equilibrar as contas de cara ao próximo curso.