O técnico lucense afirma que fixo correccións no descanso que favoreceron que o equipo saíse mellor na segunda parte
15 jun 2020 . Actualizado á 19:05 h.O adestrador do Lugo, Curro Torres, foi un claro na valoración do partido, sinalando que tras unha primeira parte que cualificou de igualada, «tiven que corrixir cousas no descanso e fixemos unha boa segunda parte». Iso si, o técnico lucense non se mostrou contento por como os seus xogadores afrontaron os últimos dez minutos do partido: «Non fomos capaces de manexar o final e sufrimos máis da conta».
Os xogadores do Lugo, a pesar de ir gañando e ter superioridade numérica no campo, pasaron apuros e non controlaron o balón, que segundo o técnico lucense era a intención que buscaba cos cambios da segunda parte.
Curro Torres quixo pór en valor a vitoria pola moral que supón para o persoal e porque se produciu ante un rival directo, ao que ademais se lle gaña a gol average particular, xa que na primeira volta empataron no Anxo Carro. «O partido foi complicado e o rival só foi capaz de meternos un gol no único disparo da primeira parte, pero tras a corrección no descanso, o equipo foi mellorando».
Torres destacou que o gol do empate lles deu a confianza e seguridade para intentar a vitoria, e máis cando o rival estaba con dez. O técnico do Lugo recoñeceu que o partido cambio coa expulsión do racinguista Manu, pero indicou que sinalou que o árbitro xa debería expulsar minutos antes ao outro defensa do Racing, Olaortúa.
«Non temos tempo para pensar e en breve xa estamos a xogar outra vez»
Este final de liga a esprint, convertendo cada partido nunha final, non deixa apenas respirar aos equipos. O técnico do Lugo apuntou que regresar tras o parón de marzo cunha vitoria «achega confianza, enerxía e optimismo», pero sinalou que non eran momentos de relaxación: «Non temos tempo para pensar e en breve xa estamos a xogar outra vez», en referencia a que o martes reciben no Anxo Carro, ás sete e media da tarde, ao Zaragoza, que loita polo ascenso directo. «Agora só podemos pensar en recuperarnos e estar preparados para o seguinte partido», explicou Curro Torres, nunha rolda de prensa na que os xornalistas non puideron formular preguntas ao fallar a plataforma en liña pola que podían intervir.
Na comparecencia do seu colega do Racing, José Luis Oltra, si se puideron facer pregunta en liña. O técnico que foi do Dépor tamén coincidiu con Torres en que «unha competición de mes e medio non permite erros e hoxe perdemos por detalles, pero tes que levantarte e volver competir de inmediato». Os santanderinos visitan o martes o campos do Xirona.
Oltra: «Ata a xogada da expulsión fomos superiores e non pasamos apuros»
O adestrador do Racing, José Luis Oltra, lamentou que os erros propios lastraron o desenlace dun encontro que sinalou que tiñan controlado, especialmente tras unha boa primeira parte. O técnico santanderino indicou que empezaran o partido aplicando o que deseñaron durante a semana: «Fixemos o partido que tiñamos pensando, sobre todo a nivel defensivo».
A xogada da expulsión de Manu cambiou o encontro. Oltra dixo que ata ese momento foran superiores e non pasaran apuros. Iso si, recoñeceu que minutos antes da expulsión de Manu tamén podía ser expulsado por dobre amarela o outro central, Olaortúa.
Preguntado sobre se tiña que cambiar a tempo a ambos os xogadores con amarelas da primeira parte, Oltra dixo «que me responsabilizo, pero é que nin me deu tempo», ademais de sinalar que xogadores desta experiencia e nivel «teñen que saber xogar cunha amarela, falarámolo no descanso».
Oltra apuntou que nesta división os erros «penalizan e castigan aos equipos» e indicou que por moi boa presión e partido que fixeron os seus xogadores «a falta de concentración en momentos puntuais» penalizan aos equipos como o seu, en referencia a que o primeiro gol dos lucenses produciuse tras o saque de falta que causou a expulsión de Manu.
O técnico do Racing definiu o enfado que tiña: «Ao acabar a primeira parte ninguén podía pensar o que ía suceder»