Reincorpórase ao equipo hispalense como director deportivo tras pasar os dous últimos anos en Italia coa Roma
17 mar 2019 . Actualizado á 17:25 h.«Ramón Rodríguez Verdejo, 'Monchi', volve á que sempre será a súa casa». Así anunciou o Sevilla este domingo o regreso do que fose o director deportivo do equipo hispalense durante preto de 17 anos. O club fixo oficial o seu retorno a través dun comunicado oficial. Terá carácter efectivo desde o 1 de abril, aínda que a súa presentación será este luns 18 de marzo a partir das 13:00 horas no Ramón Sánchez-Pizjuán.
O de San Fernando dixo ata logo ao Sevilla en abril do 2017, cando decidiu porse ao mando da parcela deportiva da Roma. Na súa etapa italiana, o equipo tivo como mellor rexistro en liga o subcampeonato da temporda 16-17 e en Europa, a semifinal da Champions a tempada pasada, cando eliminaron ao Barcelona en cuartos tras a remontada conseguida no Olímpico de Roma, aínda que moi lonxe do conseguido na súa histórica primeira etapa sevillista, onde chegou a ser o principal artífice dos nove títulos conseguidos, incluíndo cinco da Europa League.
En Roma sempre quedará no recordo por ser o home que interveu na operación que acabou co exipcio Mohamed Salah no Liverpool por uns 40 millóns de euros, cifra que hoxe se antolla pírrica para un dos actuais mellores xogadores do mundo. A súa máxima aposta durante o seu mandato, o arxentino Javier Pastore, que chegou procedente do PSG a cambio duns 25 millóns de euros, non deu ata o momento o rendemento que agardaba.
Arquitecto da mellor época do Sevilla Durante eses 17 anos en Nervión, Monchi acometeu as fichaxes de lendas da entidade andaluza como Dani Alves, Luis Fabiano, Rakitic, Kanouté ou Julio Baptista, sumado ao seu olfacto para os técnicos, xa que Joaquín Caparrós, Juande Ramos, Unai Emery e Jorge Sampaoli cóntanse entre os seus acertos. Co equipo italiano quinto na Serie A e eliminado da Copa e das competicións europeas, a directiva da Roma decidiu rescindir o contrato do seu director deportio e adestrador, Eusebio Di Francesco, o cal foi sustitudio por Claudio Ranieri.
O seu regreso ao conxunto hispalense chega tras a destitución de Pablo Machín ao mando do equipo, despois da eliminación na Europa League a mans do Slavia de Praga. Joaquín Caparrós, ata entón director deportivo, substituíu o venres a Machín como adestrador do Sevilla e estreouse este domingo ante o Espanyol. Desta forma, Monchi ocupará de novo a parcela de director xeral deportivo, cun poder na toma de decisións maior aínda que na súa etapa anterior.
