Pione Sisto deu a súa novena asistencia de gol na presente Liga
18 nov 2017 . Actualizado á 23:17 h.O Celta volveuse da súa visita do estadio Ramón Sánchez-Pizjuán, onde caeu por 2-1 ante un Sevilla que se repuxo á xogada máis efectiva do equipo celeste neste inicio de tempada, cunha asistencia de Pione Sisto (leva nove neste campionato, líder destacado do ránking) e un remate de Maxi Gómez, que con este suma xa sete goles que lle afianzan como pichichi celtiña nesta Liga.
Antes de finalizar a primeira metade, Muriel estableceu a igualada, como paso previo ao gol do ex-céltico Nolito ao comezo da segunda metade, o que consumaba a sétima remontada sufrida polo Celta ante o Sevilla en Primeira división, algo que non se vía en Nervión desde a campaña 1989/90, tamén por 2-1.
Non puido marcar Iago Aspas, polo que o seu centenario anotador co conxunto celeste deberá agardar, pero si redondeou a cifra de 50 derrotas en Primeira división co cadro vigués, rexistro que acadou no seu partido número 113 na máxima categoría.
No bando sevillista, dous vellos coñecidos da afección celtiña tamén tiveron protagonismo numérico; por unha banda, o técnico Eduardo Berizzo conseguiu a súa 50ª vitoria como adestrador na liga esañola (43 cando dirixía ao Celta máis 7 co club hispalense), mentres que Krohn-Dehli encadeou a súa 19ª vitoria como local en Liga, igualando así a marca histórica do Sevilla na elite.
Con este resultado de 2-1, as efemérides tanto de Celta como do Sevilla seguen o seu curso, dado que o equipo galego só gañou un dos seus sete partidos de Liga disputados no 18 de novembro, mentres que o cadro sevillista pode presumir de puntuar en dez dos once encontros xogados tal día como este sábado.